The Definitive Guide to Living in the Capital , Cairo , Egypt

ندخل فى الموضوع على طول؟.. بطل فى رياضة ركوب الثيران الهائجة، اللى تعتبر واحدة من أخطر وأصعب الرياضات فى العالم، بـ يتعرف على بنت عن طريق الصدفة، كانت بـ تستعد للسفر إلى نيويورك.. بـ تنشأ بينهم قصة حب رومانسية مفهومة بالنسبة لشاب فى وسامته وبنت فى نجاحها، لكن قصة الحب بـ تتقاطع مع قصة ثانية بـ يحكيها رجل عجوز كان على وشك الموت، ومن هنا بـ نشعر أننا أمام قصتين وفيلمين، مش فيلم واحد وقصة واحدة.

الكلام أخذنا ونسينا نقول لكم بـ نتكلم عن مين.. بـ نتكلم عن فيلم The Longest Ride من إخراج جورج تيلمان جونيور وبطولة بريت روبرتسون، آلان ألدا، سكوت إيستوود، جاك هوستن.. الأداء التمثيلي للأبطال كان كويس لكن متوقع ونمطي أكثر من اللازم.. حسينا بالملل فى جزء كبير من الأحداث، وحسينا بقدرتنا على التوقع والاستنتاج مع أننا فى الأصل بـ نحب الأفلام اللى تُفاجئنا، لكن الفيلم فشل أنه يفاجئنا سواء فى بدايته أو نهايته، وقد نكون تفاجئنا شوية بالحيلة الدرامية اللى اتعملت لإدخال الجزء الثاني من القصة من خلال تعرض رجل عجوز للموت لولا إنقاذ البطل له، ومن هنا بـ يبدأ فى حكاية قصة حياته للبطلة فى المستشفى، القصة اللى مش بـ تختلف كثير عن القصة اللى بـ تحصل دلوقت، ومن هنا بـ تظهر رسالة المخرج والمؤلف: "الحب هو الحب مهما اختلف المكان والزمان.. المشاعر نفس المشاعر والأحاسيس نفس الأحاسيس".

الموسيقى التصويرية ما كانتش بالقوة اللى كنا متوقعينها من فيلم المفروض أن هدفه الأساسى اللعب على مشاعرنا الرومانسية المرهفة، لكن اختيار أماكن التصوير والديكورات بشكل عام كانت قوية ومختلفة، مع التركيز على استعمال الأبطال لأجهزة Apple بداية بالـ iPhone ونهاية بالـ Mac، الأمر اللى بـ نعتبره حيلة ذكية ومختلفة من الشركة للتسويق لمنتجاتها من خلال استخدام النجوم لها.

المشكلة فى كثير من أفلام هوليوود، رغبتهم فى خلط الرومانسية بالإباحية الجنسية، للأسف الفيلم فيه عدد كبير إلى حد ما من المشاهد الإباحية، لكن الرقابة قطعتها على الفور، مش عارفين إذا كان قطع المشاهد أثر على السياق الدرامي لكننا ما لاحظناش أى اختلاف كبير فى الأحداث بعد استئصال ما يجب استئصاله، وكنا نتمنى من صناع الفيلم عدم الربط بين الرومانسية والجنس لأنه ربط خاطئ ممكن يتفهم غلط للمشاهدين المراهقين، وممكن يضايق المشاهدين المحافظين.

The Longest Ride فيلم رومانسي ما قدمش جديد على مستوى التمثيل أو الموسيقى، لكن القصة كان فيها Segment جديد ومختلف إلى حد ما.. منتظرين رأيكم فى التعليقات.