The Definitive Guide to Living in the Capital , Cairo , Egypt

المميز في فيلم The Promise إنه بيقدم جرعة متوازنة من الرومانسية والدراما والتاريخ، والأجمل أنه مقتبس عن قصة حقيقية، وبيناقش قضية تاريخية مازالت محل جدل حتى لحظة كتابة السطور دي. وكل العوامل دي صبت في النهاية في مصلحة الفيلم.

على الرغم من حرب التقييمات الشرسة اللي تعرض لها الفيلم على المواقع المشهورة زي IMDB واللي انخفض فيه تصنيف الفيلم الى 3 من 10 نتيجة اتفاق مجموعة من المصوتين ضد الفيلم، ثم ارتفع من جديد الآن إلى 6 من 10 مجددًا. ياترى السبب إيه؟ ده اللي هنعرفه من خلال نقد الفيلم.

القصة

الفيلم بيعود بينا بالزمن لفترة نهاية الحقبة العثمانية وامبراطوريتها اللي سيطرت على منطقة واسعة جدًا من الأرض والبلاد والعباد، وكمان بيستعرض المذابح اللي تعرض لها الأرمن على يد الأتراك، وهى المذابح اللي بتنكرها الحكومة التركية حتى اليوم، وبتدعي أنها كانت قتال مسلح بين طائفتين مسلحتين مش مجرد أعمال إبادة جماعية ومنظمة. علشان كده ده يفسر حالة الهجوم الشديدة على الفيلم.

بالإضافة لكل التعقيدات دي بنشوف قصة حب ثلاثية بتجمع شابة جميلة مع طالب طب ناجح وصحفي أمريكي مستقر في فرنسا. ياترى نهاية القصة دي هتكون إيه؟ ونهاية الإمبراطورية العثمانية نفسها؟ ده اللي بنعرفه من خلال أحداث الفيلم.

فريق العمل

الحقيقة أن فريق العمل كان مميز جدًا، البطولة كانت من حظ كريستيان بيل وأوسكار إيزاك وشارلوت لوبون  ورومان ميتيشيان وكلها أسماء عظيمة ومميزة إلى أقصى درجة، الأمر اللي أكسب الفيلم أهمية مضاعفة ومتعة أكبر مع مشاهدتنا له.

و الفيلم من تأليف روبن سويسورد ومن إخراج تيري جورج.

القصة والسيناريو والحوار

قصة الفيلم المميزة تضافرت مع السيناريو المحكم علشان تقدم لنا أحداث قوية وعرضها بشكل جيد ومميز، لكن الحوار على الرغم من قوته لكننا حسينا إنه (رسمي) زياده عن الحد، و (سينمائي) أكتر منه (واقعي)، وعلى الرغم من أن البعض ممكن يشوف الموضوع ده كميزة لكننا بنميل أكتر للحوارات الحقيقية اللي ممكن نسمعها في حياتنا اليومية. لكن كون أن الفيلم بيحكي عن أحداث تمت في الماضي بالأساس فكان ممكن نتسامح مع الحوار في النقطة دي.

الإخراج والأداء التمثيلي

إخراج الفيلم كان مميز، وقدر يوظف الممثلين في أدوارهم واستعمال أداؤهم التمثيلي لخدمة الأحداث. وكان كل واحد من الممثلين موضوع في مكانه الصحيح، وكل ده أثر بشكل إيجابي ومميز في الفيلم.

الموسيقى والديكورات

ديكورات الفيلم كانت متناغمة مع الفترة الزمنية اللي بتدور فيها الأحداث أما الموسيقى التصويرية فكانت عارفه بالضبط إمتى تكون هادئة وإمتي تكون مسيطرة وعالية. ودي كانت من أفضل الأمور اللي أعجبتنا في الفيلم.

الخلاصة

فيلم The Promise من أفضل الأفلام اللي شوفناها مؤخرًا، ونعتقد أن الفيلم هيحقق حالة كبيرة من الجدل.

علشان تبقى عارف:

تعاون النجمان (كريستيان بيل) و(رادي سيربيدزجا) من قبل في فيلم (Batman Begins) عام 2005.