The Definitive Guide to Living in the Capital , Cairo , Egypt

فيه حالة من الغضب الشديد ضد فيلم  The Witchسواء فى السينما أو فى مواقع التواصل الاجتماعي، وكلها بتركز على حاجة واحدة: الفيلم مش مخيف بالمرة، ما حدش يشوفه أو يضيع وقته وفلوسه عليه… الجملة دي سمعناها من أكثر من شخص فى الفترة الأخيرة، بس إحنا عاوزين نتناقش ونحلل الكلام ده بشوية صبر الأول.

من تأليف وإخراج روبرت أيجرز بنشوف قصة أسرة بتنتقل للحياة على أطراف غابة، بعد خلاف ديني مذهبي فى الفترة الذهبية للسحر والأعمال السوداء فى أوربا، وهى الفترة اللى هينتج عنها بعد كده محاكمة الناس بتهم زي الكُفر والسحر وغيرها من الأحداث، وهناك بتبدأ بعض الأحداث الغريبة فى تحويل حياة الأسرة لجحيم، بداية من فساد المحاصيل ووحشية الحيوانات وكثير من الأحداث اللى لها علاقة بالسحر والمس، والمفروض أننا بنشوف الأحداث دي فى إطار مرعب ومشوق، لكن هل ده اللى حصل فعلًا؟!

الحقيقة أن الفيلم بيلعب على أسلوب مختلف عن السائد مؤخرًا فى أفلام الرعب، وبيقدم حالة من الرعب النفسي بتسود أفراد الأسرة مع تنامي شكوكهم أن بينهم شخص مسكون أو ممسوس، وده بيخلق حالة من الرعب بيقتضي معاها أن التعبير عنها على الشاشة يكون بأسلوب تاني أقوى وأرقى من أسلوب "الخضة" اللى أصبحنا بنشوفه مؤخرًا فى كل أفلام الرعب، وده اللى راهن عليه روبرت أيجرز وخسره، على الأقل مع المشاهد المصري اللى ما عجبوش الفيلم!

الموسيقى التصويرية لعبت دور مهم جدًا فى الأحداث، ولأول مرة نسمع موسيقى تصويرية بتقترب من الصوت البشري الصارخ والمزمجر إما غضبًا أو توسلًا للرحمة، الموسيقى كان لها دور مهم فى الأحداث وحسينا أنها كانت لاعب أساسي فى المنظومة، لكن للأسف الخلل فى القصة أو عدم الاعتيادية على تقديم نوعية القصص المرعبة بالشكل ده هو اللى أخل بميزان الفيلم بدرجة كبيرة، علشان كده بنشوف الفيلم بيحصد جوائز فى الخارج لكن فى مصر الناس مش عاجبها الأسلوب ده وعاوزة الأسلوب التقليدي لأفلام الرعب.

وبما أن الموضوع فى النهاية خاضع للأذواق بنقول لكم لو كنتم من محبي الأفلام التقليدية المرعبة اللى مش بتداعب خيالكم وكلها شبه بعضها فى النهاية يبقى The Witch مش هيعجبكم، أما لو بتدوروا على مذاق مختلف للرعب وتجربة مختلفة مش لازم تكون قوية بنسبة 100% لكن على الأقل مختلفة، فى الحالة دي الفيلم هيعجبكم… ولا إيه؟