The Definitive Guide to Living in the Capital , Cairo , Egypt

الحقيقة أننا كنا مستغربين جدًا من اسم الفيلم فى البداية، مع مرور بعض أحداث الفيلم اللى أخرجه باكو كابيزاس عرفنا أن Tokarev هو موديل لمسدس روسي بـ يستعمل فى جريمة ضمن أحداث الفيلم اللى بـ يحكي عن بول ماجواير (نيكولاس كيدج) رجل الأعمال المحترم اللى بـ يلمع اسمه فى المجتمع الأمريكي، على الرغم من خلفيته الإجرامية وتسببه فى مذبحة كبيرة فى أيام شبابه، إلا أنه سدد دينه للمجتمع وبـ يحاول يعيش حياة مستقرة وآمنة مع ابنته فينيسا (راشيل نيكولاس) –وهى بالمناسبة مش ابنة نيكولاس كيدج)، بـ تدور الأحداث وبـ يتم اختطاف ابنته، وبـ يبدأ كيدج فى الاستعانة بخبراته الإجرامية وأصدقاء السوء بتوع زمان علشان يقدر يوصل لها، ثم بـ يحصل تطور درامى ضخم فى الأحداث مش عاوزين نحرقه عليكم، ونتمنى تشوفوه بنفسكم.

على الرغم من جرعة الأكشن القوية اللى بـ يتضمنها الفيلم، إلا أنه بـ يحاول يوصل عدة رسائل إنسانية واجتماعية فى نفس الوقت، منها على سبيل المثال فكرة أن الجريمة لا تفيد، ولا يمكن التكفير عنها بأى حال من الأحوال، وأن مهما الإنسان عاش الباقى من حياته كويس، ممكن ماضيه الأسود يفضل وراءه وينغص عليه حياته.

كمان من الرسائل المهمة اللى بـ يحملها الفيلم، تنبيه للمراهقين من استخدام المخدرات والخمور والأسلحة، القضايا اللى بـ تنغص حياة المجتمع الأمريكي وبـ يتم التركيز عليها دائمًا، لكن فى فيلم النهارده حسينا أن الرسالة كانت أكثر مباشرة وسطحية إلى حد ما.

جرعة الأكشن فى الفيلم كانت قوية وحادة، بـ نشوف مشاهد دموية متعددة وتبادل إطلاق نار وصراع جسدي شخصى بين الأبطال، بالإضافة لمشاهد المطاردة بالسيارات اللى حسينا أنها كان ممكن تكون أفضل، لكن بشكل عام أداء كيدج فى الأكشن كان عالى وأفضل من أعماله السابقة لو استثنينا رائعته Face off طبعًا.

مشهد الصراع فى وكر العصابة وأسلوب تحرك نيكولاس كيدج فكرنا بفيلم قديم لكن له مكان مميز فى الذاكرة هو فيلم Desperado من إنتاج 1995، ومش عارفين هل إحنا اللى بـ نحب الفيلم ده وبـ نشوف محاولات لاقتباس مشاهده فى أعمال أخرى زى فيلم Sabotage اللى تكلمنا عن اقتباس أحد مشاهده برضه من نفس الفيلم، أم أن الفيلم فعلاً بـ يؤثر على كثير من صناع الأفلام فى وقتنا الحالى؟!