The Definitive Guide to Living in the Capital , Cairo , Egypt

إحنا متفهمين تمامًا أن هوليوود بـ تستغل نجاح فيلم لعمل جزء ثاني منه، وممكن نعصر على نفسنا ليمون ونصدق أنها ممكن تعمل جزء ثالث، لكن أنها تقدم جزء رابع وتقول كمان أنها ممكن تنهي السلسلة مع جزء خامس، فى واقع الأمر ده خبر ممكن يكون صعب شوية على إدراكنا، وعلى تصديقنا أن ممكن سلسلة أفلام من خمسة أجزاء تظل قادرة على المحافظة على رونقها وقدرتها على تقديم جديد فى كل جزء، وده اللى لاحظناه فى الجزء الرابع.

من إخراج مايكل باى وتأليف أهرين كروجر بـ نشوف مارك والبرج، ستانلى توسى، ونيكولا بلتز فى الجزء الرابع من سلسلة أفلام المتحولين، الجزء اللى شعرنا بعدم وجود أى تميز أو اختلاف فى أجزاءه عن أى أجزاء أخرى قدمتها السلسلة.

الفيلم مش بـ يقدم أى جديد على مستوى القصة، نفس المخطط اللى بـ يستهدف تدمير الأرض وتفجيرها، ونفس السيناريو الخاص بأن مش كل المتحولين من الأشرار اللى عاوزين الشر للبشر، نفس كل شىء على صعيد القصة بدون محاولة تقديم أى جديد ، لكن على سبيل الإبهار والمستوى التقني للفيلم الأمر بـ يختلف.

الحقيقة أن مستوى الإبهار فى الفيلم متميز جدًا، واستخدام الخدع والمؤثرات السينمائية وصل لمستوى أكثر من مبهر، مشاهد المطاردات والأكشن وانفجارات السيارات والمباني العملاقة كان أكثر من رائع، ونقدر نوعد محبى عوامل الإثارة والأكشن والانفجارات أنهم هـ يشوفوا فيلم يحقق لهم رغباتهم بشكل كبير ومستمر على مدار أحداث الفيلم.

مارك والبرج من الإضافات الكويسة للسلسلة، وقدر أنه يضفى روح على أحداث الفيلم من خلال شخصيته، والبرج من الفنانين اللى إحنا متابعينهم بشغف وبـ نحب اجتهاده ومحاولته إضافة جديد على كل عمل بـ يشترك فيه، الجزء الرابع من المتحولين مش أكثر أجزاء السلسلة قوة من حيث الأداء التمثيلى والأحداث، لكن ممكن نقول أنه من أكثر الأجزاء اهتمامًا بالأكشن والمؤثرات الخاصة.

والفيلم بشكل عام هـ يعجب المرتبطين بالسلسلة والمتابعين لها من البداية، ومحبى أفلام الوحوش والكائنات العملاقة بشكل عام.