The Definitive Guide to Living in the Capital , Cairo , Egypt

معركة جديدة وملحمية بتقودها القرود بزعامة (سيزار) ضد البشر.. سلسلة الأفلام الأولى من نوعها اللي بتعطينا الإيحاء أن القرود أحيانًا ممكن يكونوا أفضل وأذكى من البشر!

القصة

الفيلم بيستكمل قصة (ٍسيزار) زعيم كوكب القرود، والمعركة الملحمية الشرسة اللي بيخوضها ضد البشر اللي بيتزعمهم جنرال عديم الرحمة، وفى نفس الوقت بنبدأ نتعرف على الجوانب المظلمة في نفسية سيزار ومحاولته التصالح مع نفسه ومع الدور الجديد اللي أصبح مفروض عليه.

فريق العمل

الفيلم من إخراج مات رييفز في ثاني مشاركه له من حيث الأخراج في سلسلة أفلام كوكب القرود، أما القصة فكانت لمارك بومباك اقتباسًا عن رواية بيير بول، أما بطولة الفيلم فكانت من نصيب أندي سركيس ووودي هاريلسون مع ستيف زان وسارة كانينج وآليساندرو جولياني وتاي أولسون.

الأداء التمثيلي

الأداء التمثيلي لكل الممثلين اتسم بالقوة والقدرة على أداء شخصياتهم بشكل جيد، طبعًا أندي سركيس في دور سيزار قام بدور رائع وقدر يعبر عن نفسه بشكل جيد، كمان كان من الرائع قدرته على الاندماج مع الشخصية بماضيها اللي المشاهدين حافظينه، ومستقبلها اللي متوقعين نشوفه من خلال الأداء التمثيلي.

السيناريو والحوار والإخراج

سيناريو الفيلم كان مترابط وقوي، لكن في الأجزاء الأولى من الأحداث وتحديدًا في النصف الأول حسينا ببعض الملل نتيجة أن السيناريو بالغ في التهيئة وحشد الترقب في النصف الثاني من الأحداث. لكن بداية من النصف الثاني بدأت عضلات الأخراج في الظهور وبدأنا نشوف مشاهد ملحمية قوية تميزت فيها حركة الكاميرا بشكل رائع، وطبعًا لعب الحوار دور مهم علشان يعرفنا توجهات ومشاعر كل شخصية من شخصيات الفيلم.

الديكورات والموسيقى والأزياء

موسيقى الفيلم كانت أكتر من رائعة، وجعلتنا نحاول ندور على الموسيقى الأصلية لها، كمان الديكورات وأماكن التصوير كانت ممتازة، أما المؤثرات الخاصة وإخراج مشاهد الأكشن والصراعات فحسينا أنها حقيقية جدًا ومتعوب فيها جامد، كمان كان واضح البذخ الإنتاجي في إظهار مشاهد الأكشن واللي انعكست على قوة الفيلم ككل.

الخلاصة

الجزء الأحدث من (كوكب القرود) بيقدم معركة ملحمية وقوية ومتماسكة. هل الأجزاء القادمة هتكون بنفس القوة؟ هنشوف

علشان تبقى عارف:

الفيلم يعتبر الجزء الثامن من سلسلة الأفلام الشهيرة.