The Definitive Guide to Living in the Capital , Cairo , Egypt

مانقدرش ننكر أن فيلم النهاردة من أفلام الأكشن اللى إحنا شخصيًا بـ نحب نتابعها. لكن هل قدم جديد أو أضاف شيء آخر لمنظومة السينما فى هوليوود؟ الإجابة هي: لا. الفيلم قدم جرعة جيدة من الأكشن وكفى بها نعمة، وده اللى بـ نشوفه من خلال الأحداث من البداية للنهاية.

المجرم السابق جاكوب (مارك سترونج) بـ يرجع إلى لندن للمشاركة فى أحد عمليات السرقة مع إبنه، إلا أن ضابط الشرطة الهمام ماكس لوينيسكى قام بدوره (جيمس ماكفوى) بـ ينتهز الفرصة لمحاولة الإيقاع بالمجرم العتيد.. دى باختصار القصة اللى بـ يقدمها المخرج والمؤلف ايران كريجى على مدار حوالى 100 دقيقة من التشويق والإثارة اللى مش حابيين نحرقها عليكم بالكامل علشان يكون عندكم الرغبة فى دخول الفيلم.

على الرغم من أن القصة بسيطة ومنطقية ومقنعة، إلا أن الأداء التمثيلى لم يكن بالقوة اللى متوقعينها، ناهيك عن بعض المؤثرات الصوتية ما كانتش بالجودة اللى كنا متوقعينها. وبشكل عام خرج كثير من المشاهدين وهم عندهم إحساس أن الفيلم (اتسلق) بشكل أو بأخر. وواضح أن عدوى إنتاج السبكى فى مصر تسللت إلى ستوديوهات هوليوود!

المناقشات على الإنترنت كانت محتدمة على بعض الجزئيات الصغيرة اللى ممكن يهملها المشاهد المصرى التقليدى. هل يوجد رجال شرطة غير مسلحين فى لندن؟ ومين يملك الحق فى حمل السلاح فى لندن؟ القوات المسلحة أم قوات الشرطة؟ بعض المنتديات الإلكترونية أفردت مساحة واسعه لمناقشة التفاصيل الصغيرة. الأمر اللى بـ يخلينا نعيد النظر فى طريقة تفكيرنا تجاه نفس الافلام، وتجاه أفلامنا العربية اللى بـ نعدى مئات من التفاصيل الأكبر بخصوصها بدون أدنى اهتمام من جانبنا.

 باختصار Welcome to the Punch فيلم أكشن تقليدى. لو كنت من محبى النوعية دى من الأفلام هـ يكون الفيلم مناسب لك فى سهرة فى الويك إند مع مشروب غازى.