The Definitive Guide to Living in the Capital , Cairo , Egypt

خدعة مشهورة، بـ نمارسها كلنا، والكل بـ يمارسها معانا
طول الوقت، الخدعة دى تتمثل فى أننا دائمًا بـ نشتكى من أوضاعنا الحالية، سواء فى
الشغل أو الجواز أو حتى من مشاكل أطفالنا ومطالبهم اللى مش بـ تنتهى، لكن بطبيعة
الحال لو حد فينا اتخير بين أنه يبعد عن أطفاله ومشاكلهم، أو مراته وطلباتها
المستمرة الإجابة دائمًا هـ تكون: “أنا فعلاً بـ اشتكى من حالى… لكن فى
النهاية بـ أحبه ومتقبله.

هى دى الرسالة الأساسية اللى بـ يحاول الفيلم يوصلها،
رسالة قوية، لكن ما كانتش تستحق تكون الرسالة المستحوذة طوال مدة الفيلم، خاصة أنه
تم التركيز عليها بشدة فى الربع الأخير، أما باقى الأحداث كلها كانت بـ تتكلم عن
التغير فى حياة 5 أزواج من الشباب بعد ما بـ تكتشف كل بنت فى المجموعة أنها حامل
بشكل أو بآخر.

الفيلم بـ يستعرض اختلاف قصص الحمل من واحدة للثانية،
بداية باللى بـ تكتشف أنها حامل رغم أن زوجها كبير فى السن، ونهاية باللى مش قادرة
تكون حامل فبـ تقرر تتبنى طفل من أثيوبيا.

اختلاف القصص بين كل زوجين والثانى بـ يعرفنا قيمة مهمة،
أن ما حدش راضى بحاله مهما حصل، وما حدش بـ يحس أنه واخد حقه من الدنيا بشكل كامل،
كمان بـ نشوف علاقة إنسانية غريبة بين “جارى” (بين فالكون) وبين والده
بطل السباقات المشهور، وبـ نشوف إزاى حول حياة ابنه لجحيم نتيجة أنه بـ يحول أى
حاجة فى حياته لسباق ومحاولة للتنافس على المركز الأول.

مع الوقت وتشابه الظروف بـ يتعرف كل الأزواج على بعض، وبـ
يبدأ تخرج الرجالة مع بعضها علشان يفسحوا الأولاد فى منتزة، ومن هنا بـ نعرف أن
نظرة الرجل للحمل والولادة بـ تختلف كثير عن نظرة الست، بينما كل الستات بـ يفكروا
فى المعجزة اللى بـ تتم داخلهم، وهـ يكون اسم المولود إيه، والمفروض تعمل إيه فى
الحمل والأيام الأولى للولادة، كل تفكير الرجالة كان فى توفير الدخل المادى اللى
يناسب المولود الجديد، وإزاى حياتهم هـ تختلف وهـ يكونوا أكثر انشغالاً، بالتالى بـ
يحسوا بمشاعر الحسد ناحية صاحبهم “دافيس” (جوى مانجانيلو) اللى ما عندوش
أطفال ومقضى حياته بين السياحة والرياضة، لحد ما بـ يجيء لهم فى يوم ومعاه بنت
صغيرة ويبدأ يدخل معاهم فى نادى الأباء الجدد.

اختلاف ثانى هو أن الرجالة بـ تحب دائمًا تشتكى لبعض
بخصوص الأبناء ومشاكلهم والزوجات وتعبهم، لكن الزوجات بـ يحبوا يظهروا أمام
المجتمع وأمام بعض أن حياتهم مثالية، حتى لو كانت حياتهم الحقيقية هى الجحيم بعينه.

من أجمل مشاهد الفيلم، مشهد ولادة الخمس سيدات فى أوقات
متقاربة، وفيها استعراض لإمكانيات المستشفيات وخيارات الولادة، دى حاجات بـ نفتقدها
كثير جدًا فى مصر.

الفيلم فى مجمله كويس، لكن مش كوميدى زى ما كنا متوقعين،
وحسينا أن الرسالة اللى عاوز يوصلها كانت محتاجة تركيز أكثر ووقت أقل، كمية
الاستظراف فى الربع الأخير من الفيلم كان مبالغ فيها، رغم أنه بـ يحاول يروج لفكرة
التبنى وملائمتها للناس اللى ربنا ما رزقهاش بالأولاد.