لما يفكر مجموعة من منتجي أفلام الرعب في هوليود أنهم ينتجوا فيلم عن منزل مسكون، لازم يكونوا حاجة من أثنين، أما أنهم بيعملوا (سبوبة) وعاوزين يقدموا فيلم فيه شوية مشاهد مرعبة وخلاص، أو أنهم يكونوا عاوزين يقدموا فعلًا واحد من أحسن وأقوى أفلام الرعب في العالم.. ليه؟ علشان مجال أفلام البيوت المسكونة أصبح مكرر جدًا، وأصبح صناع النوعية دي من الأفلام مطالبين بتقديم فيلم خارق الروعة، أو الإكتفاء بتقديم نسخة من أفلام تانية والسلام.
فيلم Within من إخراج فيل كلايدون، وتأليف جاري دوبرمان، وبطولة نادين فيلزاكوز، توم رايت، ميستي أوفام، مع إيرين موريارتي وبليك جينر ودوريان كينجي.
الفيلم بيحكي عن رجل فقد زوجته من فترة، وبينتقل هو وابنته لمنزل جديد في منطقة هادية علشان يريحوا أعصابهم وينسوا الماضي بكل آلامه، لكن المنزل الجديد بيخبي لهم مفاجأة مش على البال لما بيكتشفوا أن المنزل مسكون بكيان شرير بيحول حياتهم لجحيم.
زي ما إحنا شايفين القصة مكررة ومهروسة في ألف فيلم قبل كده، السيناريو والحوار ماقدموش أي جديد، علشان القصة نفسها مكررة وما فيهاش جديد، بالتالي لكم أن تتخيلوا قدر شعورنا بالملل أثناء مشاهدة الفيلم، ولما نقول أننا شعرنا بالملل في فيلم رعب، ده يعتبر شهادة وفاة للفيلم! خاصة لما يتضافر التكرار مع الأداء التمثيلي الضعيف والمبالغ فيه في بعض المشاهد.
معلومة على الطاير: تقييم الفيلم على موقع rottentomatoes 38% والفيلم واخد تصنيف رقابي R
طبعًا لما يكون مستوى السيناريو والحوار والقصة بالشكل ده، بلاش ننتظر كتير من الديكورات والموسيقى التصويرية.. الموسيقى فعلًا كانت ضعيفة أما الديكورات فتعتبر جيدة مقارنة بباقي عناصر الفيلم. لكن من إمتى بتصنع الديكورات وحدها فيلم رعب جيد!
فيلم Within فيلم رعب غير مبتكر ومكرر، وننصح بيه مهاويس أفلام الرعب اللي بيحبوا متابعة أي فيلم رعب جديد في السينما وخلاص.
علشان تبقى عارف: الفيلم حصل على تقييم 5.3 من 10 على موقع IMDB وشارك في التصويت حوالي 1000 مستخدم للموقع.