أبلة نظيرة 2017: مواقع إنترنت هتعلمكم كل حاجة عن الطبخ
Cairo 360
زمان اشتهر كتاب (أبلة نظيرة) الخاص بالطعام، وجيل بعد جيل توارثوا كتب مليانة بوصفات بالأطعمة الحادقة والحلوة على اختلاف أنواعها. ومن الكتب دي كون الآلاف مننا مشاعر إيجابية ناحية أكلات بعينها كونت طعم طفولتهم. والنهارده لما أصبح الجيل ده أباء وأمهات، جه الوقت علشان يقدموا لأولادهم وصفات جديدة ومختلفة.
وزي ما اختلفت طرق الطهي وأدواته، اختلفت طرق الحصول على الوصفات. وأصبحت الإنترنت هي البديل العصري للكتب والمجلات القديمة. تعالوا نشوف أشهر وأقوى صفحات ومواقع الطبخ.
كوكباد
من أشهر مواقع الطبخ اللي ممكن نقابلها أونلاين. مئات من الوصفات اللي بتناسب كل الميزانيات والثقافات، والأحلى أن كوكباد مش بس مجرد ويب سايت، لكنه تطبيق قابل للتحميل على أجهزة أندرويد وآبل وغيرها من التليفونات، وبكده يكون كل شخص معاه مئات الوصفات في جيبه حرفيًا!
كوكباد بيتيح الفرصة لأي شخص أنه يضع أي وصفة ويشرحها بطريقته ولغته الخاصة كمان، ومن خلال التقييمات والتعليقات اللي بيسيبها باقي المتابعين بنقدر نكون رأي عن الوصفة. والموضوع ده زي ما هو ميزة بتحقق التنوع وبتقدم لنا أطباق من كل الجنسيات والثقافات، لكن في نفس الوقت فيها عيب كبير في اختلاف طرق الوصف من شخص للتاني واختلاف اللهجات المحلية والأخطاء المطبعية.
لكن الميزة الأكيدة في كوكباد أن الواحد لو حتى مش عارف يعمل كباية شاي كشري… هيلاقى لها وصفة على كوكباد!
رابط الموقع
وصفات كنور
شركة كنور بتقدم لمحبي الطعام قسم خاص أسمه مطبخ كنور. وهو عبارة عن موقع كامل بيقسم وصفات الطعام حسب الفئات زي الشوربة والمقبلات والأطباق الرئيسية.. إلخ.
الميزة في مطبخ كنور هي الاحترافية اللي بنلاحظها في طريقة عرض وكتابة الوصفات، وكمان شعورنا بالثقة في شرح الوصفات وفى مدى قوتها، كمان كنور بتقدم صفحة على يوتيوب نقدر من خلالها نتابع أحدث الوصفات وطريقة عملها.
لكن بيبعيب الموقع في النهاية أنه مش بيوفر خدمة التعليقات أو التجاوب مع الوصفات المختلفة علشان نعرف رأي الجمهور فيها ومدى قوتها.
رابط الموقع
صفحة يوتيوب
وصفات نستلة
نستلة الشركة العالمية الرائدة في كتير من المنتجات اللي لها علاقة بحياتنا اليومية. نستلة بتقدم لمحبيها موقع خاص بالوصفات، بتقدم من خلاله مجموعة كبيرة من الوصفات واللي بيتم عرضها في الموقع بطريقة سهلة.
المميز في الموقع أننا ممكن نوصل لاي وصفة بسهولة ويسر، سواء باستخدام ميزة البحث أو حتى من خلال التصنيفات الكتيرة اللي بيقدمها الموقع ومن أهمها تصنيفات الطعام الصحي والطعام الخاص بالأنظمة الغذائية (الدايت).
لكن هنلاحظ في كتير من الوصفات اعتمادها بالأساس على منتجات نستلة، وده أمر تسويقي مفهوم بما إننا في النهاية في موقع تابع للشركة.
رابط الموقع
قسم الطبخ في فتاكات
أما محبي التجارب الاجتماعية اللي بيغلب عليها طابع الدردشة مع ناس كتير مهتمين بالطبخ والوصفات، هيلاقوا ضالتهم في قسم المطبخ في فتاكات. والحقيقة أن قسم الطبخ هناك هو القسم الأكتر احترافية من حيث تقديم تجارب طبخ (حقيقية) من بيوت مصرية وعربية عادية بعيدًا عن اللي بيحصل في برامج الطبخ على التليفزيون.
لكن في نفس الوقت بيعيب الصفحة عدم قدرتها على تصنيف الوصفات بشكل سهل ومناسب على الرغم من محاولات القائمين على الموقع عرض الوصفات المهمة في أعلى الصفحة بشكل مستمر ومحدث دايمًا.
رابط الموقع
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
