The Definitive Guide to Living in the Capital , Cairo , Egypt

كتب: محمد طلعت

سمعنا عن أتوبيس جديد تابع لشركة اسمها “مواصلات مصر”، وده فيه خدمة مميزة جدًا. والتذكرة بتاعته بتكون 5 جنيه للميني باص، أو 10 جنيه للأتوبيس العادي.

دورنا على الأتوبيس وحاولنا نوصل لخطوط السير بتاعته، خاصة إن الأخبار المنشورة ماكنتش واضحة، حبينا نجرب نركب الأتوبيس، ونسأل الناس المسئولة والركاب عن التجربة.

قابلنا عم جرجس، مشرف موقف عبد المنعم رياض، واللي أكد لنا إن الواي فاي ووصلات الشاحن والسماعة شغالين تمام. وقال إن فيه ميني باصات شغالة بـ 3 خطوط سير محددة: الأول من المطار وبيمر على الكلية الحربية، شارع الطيران، صلاح سالم، العباسية، غمرة، رمسيس، شبرا.

والخط الثاني إمبابة، كيت كات، الزمالك، بولاق أبو العلا، إسعاف، رمسيس، غمرة، العباسية، صلاح سالم، شارع القورة، الطيران، الكلية الحربية، المطار.

أما الخط الثالث بيبدأ من المظلات، موقف الحجاز، السواح، الأميرية، سراي القبة، روكسي، الكوربة، صلاح الدين، ميدان الإسماعيلية، ميدان سفير، ميدان تريومف، سانت فاطيما، الحجاز، مساكن شيراتون، المطار.

وكل الخطوط دي فئة الـ 5 جنيه للراكب. وكمان فيه خط مدينة نصر، وخط سيره: الحي السابع، جامعة الأزهر، رابعة، خضر التوني، كلية البنات سنترال ألماظة، نادي الجلاء، سانت فاطيما، ميدان الحجاز، جوزيف تيتو، موقف العاشر، كارفور العبور، الحي الخامس، نادي العبور، مدينة، شباب، محطة المستقبل في العبور. وسعر التذكرة على حسب المسافة سواء 5 أو 10 جنيهات.

أما من وسط القاهرة، إحنا في كايرو 360 ركبنا أتوبيس M5. وده خط من عبد المنعم رياض لحد التجمع الخامس. وسعر التذكرة فيه 10 جنيه، وخط سيره: شارع الجلاء، رمسيس، غمرة، لطفي السيد، العباسية، امتداد رمسيس، نادي السكة، جامعة الأزهر، طريق النصر، المخيم الدائم، الخليفة القاهر، الحى السادس، محور الشهيد، محور المشير، شارع التسعين، بوابة 4 بالجامعة الأمريكية.

أول ما ركبنا سألنا عن المحصل، طلع مش موجود. وبيتم قطع التذكرة من خلال السائق. اللي بتسلمه الفلوس وبيضغط على كلمة طباعة في الماكينة الإلكترونية اللي قدامه وبتطبع التذكرة فورًا.

كراسي الأتوبيس عادية، زي مواصلات الهيئة العامة للنقل الجديدة. ولكن يميزها إنها أكبر شوية، وجنب كل كرسي مخرجين لوصلتين USB، وفتحتين صوت تم تجربتهم وكانوا شغالين.

أما الواي فاي فكان شغال بدون رقم سري. ولما سألنا قالوا أنه أي حد داخل الأتوبيس يقدر يدخل على الإنترنت مباشرة علشان محدش يدور على الرقم كل شوية. وللأسف الإنترنت كان ضعيف جدًا.

الأتوبيس كمان فيه مكان مخصص لذوي الإحتياجات الخاصة. من خلال زرار تحكم خارج الأتوبيس تضغط عليه بيفتح ممر خاص. علشان لو الشخص على كرسي يقدر يطلع عليه مباشرة. وفيه مقعدين ومسند ممنوع استخدامها للأشخاص العاديين.

سألنا الركاب إيه رأيكم في الخدمة، وكانوا مبسوطين منها. لكن عندهم مخاوف من أن السائقين ميلتزموش ويخلوا الناس يركبوا بعد ما الكراسي تنشغل، والمواطنين يركبوا فى الطرقة. وكمان من سلوك الناس اللي بتبقى متعمدة إنها تخرب وتشوه أي حاجة جديدة. وتمنوا إن يبقى فيه كاميرا مراقبة للأفراد، علشان يتوقع عليهم غرامات لو أساءوا الإستخدام.

أفضل ما في الأتوبيس: الكل هيبقى قاعد ومحدش واقف.

أسوأ ما في الأتوبيس: عددها قليل والانتظار كتير فى الموقف.