The Definitive Guide to Living in the Capital , Cairo , Egypt

رمضان بييجي ويطلع أحسن وأجمل ما فينا، ويكشف لنا عن طيبة وجدعنة وأصالة شعبنا. وبنلاقي نفوسنا شايلة طاقة إيجابية جبارة، ودايمًا بتودينا على كل سكك الخير. لكن مش دايمًا بنعرف نتجاوب معاها، لأننا أحيانًا ما بنبقاش عارفين نعمل إيه، أو نبدأ منين، ومش دايمًا برضه بيبقى متاح لينا أننا نشارك في عمل مؤسسي مع أحد المؤسسات الخيرية اللي شغالة على الأرض بالفعل، فبتروح الطاقة دي من غير ما نستغلها.. إحنا هنا هنحاول نقول لكم على مجموعة أفكار بسيطة ممكن تعملوها مع أصدقائكم في رمضان وتوجههوا فيها طاقة الخير اللي جواكم من غير أي كلكعة.

1- الإفطار السريع:

الناس اللي شغلها بيخلص متأخر والتزاماتها بتضطرها تفضل في الشارع لحد وقت الفطار. الناس دي بتبقى مستنية الكيس اللي بيتوزع عليهم في الشارع علشان يكسروا صيامهم ويبلوا ريقهم في عز الحر بعد تعب اليوم. اتفق أنت وأصدقاءك أنكم تعملوا أكياس صغيرة فيها علبة عصير صغيرة مع كام بلحة كده وتقفوا في الشارع وقت الفطار توزعوها على الناس دي.

 

2- الزيارات:
الناس اللي ظروف الدنيا اضطرتهم يعيشوا بره المجتمع غصب عنهم، سواء لمرض أو لظروف اجتماعية، الناس دي بتستنى أننا نحسسهم أنهم جزء مننا، وأن الزمن ما تجاوزهمش، ونحببهم في الحياة من تاني، مستشفى سرطان الأطفال، أو معهد الأورام، أو دور الأيتام، أو دور المسنين. اتفق مع صحابك ونظموا زيارة لمكان من الأماكن دي.
وكل زيارة بقى وليها متطلباتها، يعني بالنسبة لمستشفى السرطان ومعهد الأورام الزيارة فيهم بتبقى محتاجة أنك بس تبسط الولاد وتديهم أمل في الحياة. خد معاك لعب واديهالهم، البسوا لبس مبهج ومضحك والعب معاهم،قولهم كلمتين حلوين يخلوا نفسيتهم أحسن، ويخلوهم أقوى. ولو هتاخد لهم أكل أو شرب فاعرف الأول من إدارة المستشفى إيه الأكل اللي ما فيهوش مشكلة بالنسبة لهم علشان ما تجيبش حاجة ما ينفعش ياخدوها.
أما دور الأيتام فالأولاد بيبقوا محتاجين فوق أنك تلاعبهم وتضحك معاهم، محتاجينك تحسسهم أنهم ما ينقصوش حاجة عن غيرهم، وأن ظروفهم دي هما يقدروا أنهم يتجاوزوها ويبقوا أقوى منها وينجحوا في حياتهم. وده طبعًا حسب سن الولاد واستيعابهم.
أما بالنسبة لدور المسنين فالناس الكبيرة بيبقوا محتاجينك تسمعهم وبس. سيبهم يتكلموا، خد فطارك أنت وأصدقاءك واقعدوا افطروا معاهم واسمع حكاويهم عن حياتهم وتجاربهم. وخلي تعليقاتك على حكاويهم دايمًا إيجابية، وحسسهم باهتمامك بأنشطتهم الحالية، ويا سلام لو أخدت معاك كام كتاب حلوين كده وسبتهم لهم يقرءوا فيهم.. حسسهم أن لسه الحياة قدامهم، وأن الزمن ما تجاوزهمش ولا حاجة.

 

3- قَلِّب دولابك:
كل واحد فينا لو فتح دولابه هيلاقي لبس كتير جدًا جدًا ما بقاش يستخدمه. إما لأنه ما بقاش ييجي عليه أو علشان شكله مابقاش مناسب أو حتى لأنه مابقاش بيستلطف يلبسه، وبيفضل مركون ما بنعملش بيه حاجة، في حين أن في ناس أكيد محتاجينه، جرب تطلعه وتغسله وتكويه وتحطه في أكياس وتطلب من أصحابك كمان يعملوا كده، وتنزل تديه للناس الغلابة. سواء اللي بتقابلهم في الشارع أو اللي تعرفهم بشكل مباشر أو حتى تديهم للجمعيات الخيرية اللي بتوصلهم للمحتاجين.

4- طبق اليوم:
سفرة رمضان دايمًا بتبقى عمرانة بكل الخيرات، وفي أكل كتير جدًا بيفيض، وبيترمي. وفي ناس بتبقى مش لاقية اللقمة الحاف حرفيًا، جهز كام علبة أو طبق فويل صغير، وحط الأكل اللي فايض فيهم. واتفق مع أصحابك كلهم يعملوا كده. وانزلوا سوا وزعوهم على المحتاجين.

5- شنطة رمضان:
النشاط الأشهر لكل الناس في رمضان. شنطة فيها شوية أكل مش مطبوخ علشان ينفع للتخزين ويفضل مكفي المحتاجين فترة قدام، ودي أمرها سهل خالص، هتجيب شوية أكياس نواشف (رز ومكرونة وعدس وسكر) وعلب سمن وزيت، وتعمل شنطة من المكونات دي. وتنزل توزعها على المحتاجين.

وأخيرًا.. لو أنت حابب تشتغل في رمضان لكن مش بتحب تشتغل لوحدك وتحب تشتغل مع مؤسسة وسط ناس كتير علشان تحس بجو رمضان؟ اقرأ مقالنا من رمضان اللي فات عن المؤسسات والمبادرات اللي ممكن تتطوع بوقتك ومجهودك معاها في رمضان السنة دي.

ولو أنت ما عندكش وقت للتطوع بس تحب تشارك بالتبرعات المادية أو العينية فممكن برضه تقرأ دليلنا من رمضان اللي فات عن المؤسسات والجهات اللي ممكن تتبرع ليها في رمضان السنادي.

كل سنة وأنتم طيبين.. ورمضانكم خير وإنسانية ورحمة دايمًا.