أكرم الشرقاوي: بقضي أغلب وقتي عند الهرم المايل في دهشور وباي باي حمزاوي
Mohammed Sabry
أكرم الشرقاوي أو حمزاوي زي ما كل الناس عرفته، فنان متعدد المواهب، اتعرف ببرنامج “فيفا لاسوستا”، اللي قدم فيه دور مذيع إيطالي بيحاور فنانين مصريين، وقبله لعب شخصية “حمزاوي” المخرج غريب الأطوار في سلسلة إعلانات ميلودي. ومؤخرًا شارك في فيلم “طلق صناعي” من إخراج خالد دياب. وبطولة ماجد الكدواني وحورية فرغلي.
وعلشان نعرف “حمزاوي” أكتر، كان لنا معاه حوار في كايرو 360:
في البداية قولنا إزاي تم اختيارك لفيلم طلق صناعي؟
اللي رشحني للدور هو المخرج خالد دياب. كلمني وقالي أنت اللي هتعمل الدور ده. في الأول كنت متردد ومش متحمس للفكرة، بس هو صمم وروحت علشان أقرا الاسكريبت. اتناقشنا في الدور وتفاصيل الشخصية، واقتنعت به وعملته.
هل الدور خد منك مجهود كبير علشان تقدمه بالمستوى ده؟
في الحقيقة الدور ماكنش صعب عليا بشكل كبير. لكن بتوجيهات كتيرة من المخرج قدرت أطلعه بالشكل ده. أنا عندي مشكلة في ريأكشنات وشي، بتكون مبالغة أوي. وغالبًا بحرك حواجبي كتير وبرفعها كل شوية. لكن خالد كان دايمًا بيقولي هدي نفسك شوية. والحركة هنا تكون بالشكل ده أو صوتك هنا يكون كده. لحد ما قدرت أطلع الشخصية بالشكل اللي أنتم شوفتوه.
كلمنا عن تجربتك مع داود عبد السيد في فيلم “قدرات خارقة”.
بيبتسم أكرم وبيقول لنا: داود عبد السيد شافني وقال لي أنا عايزك معايا. وكان بيساعدني في كل حاجة خلال التصوير. ده حتى المشاهد بتاعتي كانت تقريبًا مش موجودة، بس هو اللي زودلي وقت على الشاشة.
هل شخصية حمزاوي اللي ظهرت في حملة ميلودي انتهت؟
شخصية حمزاوي دي كوبي رايت لجمال مروان. وماقدرش أعلمها تاني. لكن الشخصية كان هيتعملها فيلم كامل. وبالفعل بدأنا الكلاسات والدروس الخاصة بالشخصية وأحداث الفيلم. لكن كل حاجة وقفت لما قامت ثورة يناير 2011. لكن حتى الآن مفيش حمزاوي تاني.
قدمت برنامج “لاسوستا” و”عرض كبير”.. هل التجربة فادتك؟ وهل هتكررها؟
هنا بقى ضحكته ظهرت بشكل أكبر وقال: برنامج عرض كبير ده كان مأساة، للأسف مضيته قبل ما أشوف الحلقات، وبعد كده اتفاجئت بالمحتوى بتاعه. ده غير إني مش بحب الاستاند أب كوميدي. ودي تجربة لا يمكن أكررها.
أما لاسوستا فكان لطيف وأنا حبيت الشخصية. والناس تقبلته وكانت معجبة به. وقبله ماكنش حد يعرفني. وطبعًا من خلاله اتعرفت للناس بشكل أكبر.
في طلق صناعي خرجت من القالب الكوميدي.. هل هتقدم أدوار متنوعة على طول؟ ولا شايف الكوميدي أقرب لك؟
أنا بالفعل خرجت تمامًا من القالب الكوميدي في طلق صناعي، والناس تقبلت ده بشكل ملحوظ. الكوميديا مش لوني وبس، ولو اتعرضت عليا حاجة مختلفة ومناسبة هعملها.
وبعدها ضحك وقال: كنت عايز أعمل فوازير رمضان وأكشن.
كان لك تجربة صحفية في مجلة Teen Stuff.. هل فادتك في الفن؟ ولا كانت مجرد شغل؟
شغلي في الصحافة مالوش أي علاقة بالفن. وخصوصًا إني اشتغلت حاجات كتيرة. اشتغلت في الماركيتنج، تدريس الإنجليزي، الإعلانات، وحاجات تانية كتيرة. كنت بتنطط من مكان لمكان. بس يمكن جزء من شغل الإعلانات قريب من التمثيل.
في الختام قول لنا إيه أكتر مكان بتحبه في القاهرة؟
أنا شخص بحب الأرض والطاقة اللي بتيجي منها. فيه هرم في دهشور اسمه هرم سنفرو (أو الهرم المايل). هو مكان مفيش ناس كتير تعرفه. بحب أروح هناك وأقعد كده مع نفسي. مابيكونش قدامك أي حد على امتداد النظر. وبستمتع بالطبيعة والقعدة الهادية. هناك بصفي دماغي من كل حاجة، واستمتع بمنظر الأرض الواسعة والسماء اللي قدامي. ده غير إني بحب أماكن زي الحسين، بنزل أتمشي فيها من وقت للتاني.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
