The Definitive Guide to Living in the Capital , Cairo , Egypt

رخصة القيادة، بعبع بيواجه كل الناس اللي عاوزة تسوق، مراكز تعليم قيادة السيارات في كل مكان، المشكلة مش تعليم السواقة لأن الموضوع متاح، المشكلة الكبيرة بتكون في الرخصة، اللي ماحدش بيبقى عارف هياخدها إزاي، أساطير كتير بتدور حولين اختبار القيادة ومدى صعوبة اختبار الإشارات، واستحالة النجاح في الاختبار العملي بالعربيات التابعة للمرور.

قصص كتير مرعبة حولت فكرة الحصول على رخصة قيادة لحاجة أشبه بمواجهة الوحش، اللي علشانه لازم تعدي السبع بحور على ضهر قشرة موز، لكن إحنا هنا في كايرو 360 هنقول لك على الحل السليم اللي هيجيب معاك من الآخر، بدون تورط أو مشاكل وبكل سهولة ويسر في سبع أيام بس.

البداية هتحضر الورق وتتأكد إنك تقدر تطلع الرخصة فعلًا، المسألة كلها إن سنك ما يقلش عن 18 سنة لو هتطلع رخصة خاصة، وما يقلش عن 21 سنة لو هتطلع رخصة مهنية أو هتتدرب عليها، أما الورق المطلوب فهو شهادة باطنة ونظر، من أي مستشفى أو مستوصف جمبك، بالنسبة لغير المتعلمين لازم يكون حاصل على شهادة محو أمية على الأقل، أما باقي الأوراق، فهي صورتين من بطاقتك الشخصية، و4 صور شخصية ليك وبس خلاص.

هتاخد الورق وتطلع على وحدة مرور بين السرايات في الجيزة، تقدم في معهد التدريب على قيادة السيارات، هتقدم ورقك، ويتعملك ملف في المرور، هتدفع رسوم المدرسة 600 جنيه و125 جنيه رسم تنمية موارد الدولة، الكلام ده كله ما بياخدش ساعة لساعتين بالكتير، بعدها بيتحددلك معاد هتبتدي إمتى الكورس اللي عبارة عن سبع حصص، منهم حصة في الإشارات والباقي تدريب على اختبار القيادة لمدة 6 أيام لحد ما تتقنه وتعديه بسلام.

أول يوم هيكون عبارة عن تدريب لكل دفعتك في مدرسة السواقة، داخل قاعة فخمة في إدارة المرور، على الإشارات، من خلال محاضرة بيقدمها رئيس إدارة المرور بنفسه، لكن للأسف أحيانا بيكون مش فاضي فبيتكلم بسرعة عن القيادة والقواعد  وبيرشدوك لموقع تتعلم منه الإشارات، لكن بدون ماتمتحن فيها لأن المحاضرة دي سواء أخدتها أو لأ، بتغني عن الامتحان.

في نفس اليوم المتدربين بيتوزعوا على المدربين، ولما بتعرف مدربك وبتاخد جدول بالحصص، بتحدد معاه المعاد المناسب ليك من 6 صباحا للساعة 10 أو 11 حسب المتاح، وبتلتزم بالمعاد دا لمدة ست أيام

أول يوم في التدريب بتروح ساحة التدريب وبتبتدي تدرب على عربية معينة، سواء شاهين أو 128، مانيوال طبعًا، والتدريب الأولي بيكون على تدوير العربية والطلوع بيها لقدام ولورا، حصة لمدة ساعة إلا ربع على نفس الحركة لحد ما تتقنها.

تاني حصة ولحد آخر يوم بتتدرب على الدوران حولين الأقماع، والركنة، والطلوع لقدام والرجوع لورا، وفي اليوم الأخير بتمتحن على نفس العربية في نفس الساحة على نفس الشيء اللي اتعلمته طول الأيام الستة.

يوم الاختبار هتكون متوتر طبعًا، لكن بنقولك إن كل اللي بيدخل الامتحان بيعدي، مش بالواسطة ولا الرشوة، لكن لان الامتحان سهل فعلًا وأنت هتكون اتدربت عليه بشكل كافي طول الأسبوع.

بعد لما بتخلص امتحانك في مرور بين السرايات، بتاخد ورقك بعدها بيوم أو اتنين من مركز التدريب، ملفك بيكون جاهز تمامًا ومافيش أي حاجة ناقصة بتطلع بيه مباشرة على المرور اللي أنت تبعه ومش بتكون محتاج أي حاجة إضافية أكتر من حافظة بيضا بـ 25 جنيه، و550 جنيه مصاريف استصدار الرخصة، شاملة الدمغات والورق الإضافية وكل الحبشتكنات.

دفعت الفلوس وقدمت ملفك، وكله تمام في المرور اللي تبعك؟ وأنت قاعد بيندهوا عليك تتصور وبعدها بربع ساعة أو 10 دقايق أحيانًا بيندهوا عليك وبتاخد الرخصة، عارفين إنك في اللحظة دي مش هتبقى مصدق نفسك إنك أخدتها بمجهودك، بس فعلًا دي الحقيقة ودا اللي بيحصل مؤخرا بكل سهولة ويسر.

جوه المرور هتلاقي لافتات كتير بتتكلم عن الرشوة وإن الراشي والمرتشي في النار،  رئيس وحدة المرور هيحذرك من إنك تدفع رشوة وهيقولك لو حد طلب منك فلوس تعالى قولي، بس كل ده مش هايمنع إنك ممكن تتعرض لناس هتطلب منك فلوس في النص وإنت حر في اللحظة دي إن كنت تدفع أو ماتدفعش مفيش حاجة هاتقف عليهم.

أحسن حاجة: الوضوح والسهولة وسرعة استصدار الرخصة.

أسوأ حاجة: بعض الناس اللي بتطلب رشوة أثناء التدريب بدون سبب و بدون خدمات حقيقية.

نصيحة كايرو 360: خد الطريق السهل وخش مدرسة المرور وسيبك من الواسطة والمحسوبية لو فعلًا عاوز تطلع رخصة اللي هتدفع في حاجة مش شرعية هو هو اللي هاتدفعه في طريق رسمي مفيهوش غش ولا خداع.