The Definitive Guide to Living in the Capital , Cairo , Egypt

كل سنة وأنتم طيبين، وكل أعياد وإحنا بخير ومبسوطين، وبما أن بكره الثلاثاء 7 يناير أجازة رسمية للمصريين، النهاردة هنشاركم دليل الخروجات المتاحة ليوم الثلاثاء، علشان تخرجوا وتنبسطوا وتحتفلوا بيوم الأجازة، وماتنسوش تتابعوا النشرة الجوية علشان تعرفوا هتلبسوا إيه في الجو ده.

خلينا نبدأ مع متحف الطفل اللي هيكون عامل شو عرائس ومهرج وأراجوز ومسابقات وألعاب ببلاش للأطفال وهيبدأ فقراته الساعة 10 صباحًا، وهيستمر حتى 2 ظهرًا.

لو عاوزين خروجة مميزة، بس دي للناس اللي بتحب الشتاء والسقعة فممكن تشاركوا رحلة يخت في النيل من الساعة 2 الظهر، بـ 100 جنيه وهتستمتعوا كمان بالمزيكا المختلفة.

كمان هيكون موجود في قرية الواحة بالهرم حفلة للفنان الشعبي رضا البحراوي واللي هتبدأ الساعة 9 بالليل، وهتستمر لحد بعد منتصف الليل، واستمتعوا بالأكل البدوي المشوي والغناء الشعبي والرقص.

أما الخيمة البدوية في الوراق، عندهم بروجرام فنون شعبية ومغنى ورقص وفرحة بدون رسوم دخول أو حد أدنى للطلبات.

أما عشاق الجنوب والفلكلور الصعيدي فموعدكم مع حفلة ميكس لارج الساعة 7 مساءً، في ساقية الصاوي، بتذكرة سعرها 57 جنيه.

وفي دار الأوبرا المصرية هتكون موجودة السوبرانو  نيفين علوبة الساعة 8 مساءً، على المسرح الصغير بتذكرة سعرها 110 جنيه.

أما منتجع أوازيس طريق الإسكندرية الصحراوي فتقدروا تستمتعوا هناك بحفلة عيد الميلاد اللي هينظموها مع عشاء من أجمل الاطباق الأوربية وسط برامج ترفيهية وعروض مختلفة اللي هتبدأ الساعة 6 مساءً.