The Definitive Guide to Living in the Capital , Cairo , Egypt

الدراسة بدأت، ومعاها بدأت معاناة المذاكرة والدروس والمشاوير، إلخ. في الوقت ده من السنة بتكون محتاج كل تركيزك علشان تقدر تذاكر كويس. وتطلع بأفضل نتيجة. إحنا جبنا لك أهم 5 نصائح، تساعدك على تنظيم وقتك في الدراسة:

1- اعمل خطة دراسية

لازم يكون عندك خطة تمشي عليها في الدراسة. وتكون كل حاجة مظبوطة ومعمول حسابها. تقدر تعمل جدول بمهامك اليومية، زي ميعاد نومك، وقت المذاكرة، وقت التليفزيون أو الخروج. علشان تفضل الأمور تحت السيطرة، ومفيش حاجة تاخد من وقت التانية.

2- نظم وقت المذاكرة

في وقت المذاكرة ماينفعش تفضل قاعد على الكتاب بالساعات. لازم تاخد بريك، وغالبا بيكون كل 50 دقيقة أو ساعة. بتاخد 5 أو 10 دقايق تفصل فيها من المذاكرة. ممكن تقوم تتمشى أو تعمل حاجة تشربها مثلًا.

3- ذاكر أول بأول

دايمًا ماتراكمش حاجة عليك. خلي كل جزء بتدرسه يكون له الأولوية في مذاكرة كل يوم. إلا إذا كنت محدد له وقت تاني انت عارفه ومرتبه كويس. ده كمان هيساعدك في تخصيص وقت المراجعة الكافية لكل مادة. إنما لما تراكم مواد كتيرة على بعضها، هتوه وسطها ومش هتعرف تدي كل جزء حقه.

4- ابعد عن أي حاجة تفصلك

بلاش وقت المذاكرة تفضل ماسك الموبايل، ومقضيها لايك وشير على فسيوك وإنستجرام. ماتقعدش في المكان اللي بيتفرجوا فيه على التليفزيون، وخليك في أوضة هادية. ممكن كمان لو تحب تروح تذاكر في كافيه يكون هادي ومناسب.

5- اهتم بنفسك وصحتك أولًا

ماينفعش تجهد نفسك في المذاكرة، وماينفعش تجهد نفسك علشان تذاكر. لازم تاخد كفايتك من النوم، وماينفعش وقت المذاكرة ييجي على قوتك نومك. لأن النوم الكافي و راحة جسمك، هتساعدك تحصل أكبر قدر من المعلومات.

وكمان الوقت اللي انت مخصصه للخروج والفسح لازم ياخد حقه. لأن ده زي ريفريش لنفسك علشان تقدر تواصل.