The Definitive Guide to Living in the Capital , Cairo , Egypt

الحياة في كايرو

النهارده.. ذكرى مرور 1051 عام على تأسيس القاهرة علي يد “جوهر الصقلي”

العيد القومي للقاهرة تاريخ القاهرة محافظ القاهرة محافظة القاهرة
النهارده.. ذكرى مرور 1051 عام على تأسيس القاهرة علي يد “جوهر الصقلي”
بواسطة
Mohamed Talaat

بتعتبر القاهرة من أجمل وأقدم مدن العالم، وبيرجع تاريخها لفجر الحضارة البشرية، وبتعتبر من أقدم وأعرق المدن الشاهدة على حضارات عديدة مرت بيها، ده غير إنها المقصد العالمي للسياحة والثقافة والفنون ومركز إلتقاء للأعمال والتجارة والعلوم، وبتسمى مدينة الألف مئذنة بسبب كثرة مساجدها.

النهارده محافظة القاهرة بتحتفل بعيدها القومي اللي بيوافق ذكرى مرور 1051 عام على تأسيسها علي يد القائد جوهر الصقلي سنة 969 م في عهد الخليفة المعز لدين الله الفاطمي.

وبالمناسبة دي، قال اللواء خالد عبد العال محافظ القاهرة، في تصريحات إعلامية، إن السنة دي هتشهد افتتاح عدد من المشروعات الخدمية اللي هتخدم كل اللي عايشين في محافظة القاهرة، منها مثلًا مشاريع خاصة بـ 19 مدرسة (بناء حديث – توسعة – تطوير)، وده هيكون في الأحياء الأكثر احتياجًا في جميع مناطق القاهرة، بإجمالي 333 فصل وبتكلفة 123 مليون جنيه.

كمان هيتم تزويد هيئة النقل العام ب 550 أتوبيس جديد بتكلفة 550 مليون جنيه، وبكده هيزيد حجم الإسطول بنسبة 160% ليصبح 3250 أوتوبيس بطاقة 5 مليون راكب في اليوم، بالإضافة لفتح عدد من المراكز الطبية ومراكز الشباب بمناطق القاهرة المختلفة.

وعلشان تبقوا عارفين، القاهرة كان اسمها زمان القطائع والفسطاط، وكمان أطلق عليها المنصورية، وبعدها اتحول اسمها إلى القاهرة بعد ما فتحها القائد جوهر الصقلي بأمر من الخليفة الفاطمي المعز لدين الله في 6 يوليو عام 969م.

وبتضم القاهرة آثار فرعونية ورومانية وبيزنطية وقبطية وإسلامية، والأمر ده خلاها مدينة ساحرة بتجذب السائحين لزيارتها.

مقترح