النهارده في القاهرة: أفلام وإنشاد ومزيكا
Cairo 360
لو حابب تغير مودك بعد شغلك أو جامعتك تقدر تخرج النهارده لمكان مختلف في القاهرة، التفاصيل في أجندة كايرو 360:
دار الحكمة في نقابة الطباء، هتعرض فيلم “A Simple Plan“. الفيلم بيدور عن 3 أصدقاء بيلاقوا مبلغ مكون من ملايين الدولارات. وبيحاولوا يحتفظوا به، ويخفوا الموضوع عن السلطات. لكن بتبدأ بينهم علامات عدم الثقة. العرض هيبدأ الساعة 6 مساء. والدخول مجانًا.
فرقة الحور للإنشاد الديني، وهي فرقة بنات فقط، هتقدم حفلة إنشاد على مسرح الحكمة في ساقية الصاوي. الحفلة هتبدأ الساعة 7:30 مساء. وسعر التذكرة: 30 جنيه.
أما مركز مكان فهيستضيف فرقة “فلامنكا“. اللي هتقدم مزيج من الموسيقى الأسباني والشرقي. الحفلة هتبدأ الساعة 8 مساء. وسعر التذكرة: 40 جنيه.
وتاني في ساقية الصاوي، في قاعة النهر. هيكون فيه حفلة للفنان مصطفى ناصر وفرقته. الحفلة هتبدأ الساعة 6 مساء. وسعر التذكرة: 25 – 30 جنيه.
سهرة سعيدة.