النهارده في القاهرة: أفلام وحفلات فنية
Cairo 360
بنبدأ مع بعض أسبوع جديد، وفي نفس الوقت بنودع شهر فبراير القصير. أو ده المفروض يعني، رغم إننا حاسين إنه طول شوية. عمومًا طويل أو قصير، إحنا اللي يهمنا أجندة كايرو 360 واللي فيها. تعاولوا نشوف:
النهارده درب 1718 في مصر القديمة بيعرض الفيلم الوثائقي “جاي الزمان” للمخرجة دينا حمزة. وده بالتنسيق مع سينما زاوية. الفيلم بيتناول لمحات من حياة الشاعر الغنائي الراحل محمد حمزة. اللي كتب لكبار الفنانين زي عبد الحليم وشادية ووردة. العرض هيبدأ الساعة 7 مساءً. والدخول مجانًا.
أما علبة ألوان في الزمالك، هتعرض فيلم “حكاية سناء” للمخرجة روجينا بسالي. والفيلم بيتناول قصة حياة الفنانة سناء جميل ومشوارها الفني. وحياتها مع زوجها الاستاذ لويس جريس. وهيكون موجود في الحضور مخرجة الفيلم، وضيوف الفيلم من الفنانين. العرض هيبدأ الساعة 7:30 مساءً. سعر التذكرة: 50 جنيه.
فرقة الحضرة هتمتعنا بحفلة إنشاد ديني من حفلاتهم المميزة، على مسرح النهر في ساقية الصاوي. وبيشاركهم الحفلة دي الشيخ إيهاب يونس. الحفلة هتبدأ الساعة 7 مساءً. وسعر التذكرة: 35 – 40 جنيه.
نرجع تاني للزمالك، بس المرة دي في المعهد الهولندي. اللي هيعرض فيلم “Death on the Nile”. المأخوذ عن رواية أجاثا كريستي لعام 1937 بنفس الاسم. وبيدور عن جريمة قتل غامضة، بتحصل على سفينة أثناء رحلة نهرية في نهر النيل. العرض هيبدأ الساعة 7:30 مساءً.
يا ترى قررتوا هاتخرجوا فين النهارد؟