النهارده في القاهرة: اسمع أجمل ألحان الجاز والبلوز من أيرلندا
Cairo 360
يوم جديد، بداية مختلفة، ويا رب دايمًا كل بداية أحلى من اللي قبلها. تعالوا يلا نشوف النهارده معانا إيه، في جندة كايرو 360:
النهارده ميعادنا مع حفلة جاز من نوع خاص. هيحييها الفنان الأيرلندي “Keith Burke” في علبة ألوان في الزمالك. واللي بيقدم مزيج مميز من موسيقى الجاز والبلوز. “كيث” أحيى حفلات في أيرلندا وألمانيا والولايات المتحدة ولبنان. ودلوقتي في مصر. الحفلة هتبدأ الساعة 8 مساءً. سعر التذكرة: 60 جنيه.
في ساقية الصاوي، بنكمل لليوم التاني مع الحفلة الموسيقية اللي بيحييها عازف العود الفنان نصير شمة. واحد من أبرز الموسيقيين العرب اللي ظهروا بقوة في نهاية القرن العشرين. الحفلة هتبدأ الساعة 7:30 مساءً. وسعر التذكرة بيبدأ من 65 جنيه.
الغنا الشعبي والمواويل التراثية لها مزاج خاص، وجمهورها الكبير في كل حتة. وده اللي هيقدمه لنا الفنان سيد ركابي في مكان، من خلال مجموعة من أغاني الجنوب الأصيلة، الخاصة بعائلة الجعافرة. الحفلة هتبدأ الساعة 8 مساءً. سعر التذكرة: 30 جنيه.
وهنختم جولتنا النهارده من سيما دكة في دكة أضف. اللي هتعرض الفيلم الأسباني “Open Your Eyes”. وبيدور عن شاب بيلاقي نفسه في مصحة نفسية بعد حادثة سيارة. ومش فاكر حاجة قبل الحادثة غير البنت اللي حبها. العرض هيبدأ الساعة 7 مساءً. الفيلم للكبار فقط، والدخول مجانًا.
حالوا تفضوا نفسكم بعد الشغل علشان ماينفعش تضيعوا خروجة من دول.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
