النهارده في القاهرة: سينما ومسرح ومعارض فنية
Cairo 360
محمد منير قال: لو بطلنا نحلم نموت. وإحنا بنقول: لو بطلنا نخرج أكيد هنتضايق ونزعل ونكتئب وحاجات تانية كتيرة. وعلشان مايحصلش الكلام ده، تعالوا نشوف أجندة كايرو 360 وخروجاتها الجديدة:
بلكون هليوبوليس في مصر الجديدة، هيعرض الفيلم الإيطالي “La Pazza Gioia”. الفيلم بيدور عن بنتين عايشين في مصحة نفسية في “توسكاني”. كل واحدة لها قصة وحياة مختلفة. لكن لما بتيجي فرصة للهروب، هم الاتنين بتجمعهم مغامرة بتغير حياتهم للأبد. العرض هيكون الساعة 8 مساءً. سعر التذكرة: 25 جنيه.
دار الأوبرا المصرية هيكون فيها معرض “حياة”، بقاعة صلاح طاهر. بيشترك فيه الرسام والفنان العالمي، وجيه يسي. مع المصور الفوتوغرافي، جلال المسري. وكل فنان منهم بيعرض أعماله اللي بتبين إحساسه بالحياة والمشاعر المختلفة. المعرض هيستمر لحد يوم 9 أبريل. والدخول مجانًا.
ونروح لساقية الصاوي، مع فرقة “الحلم” المسرحية، اللي هتقدم العرض المسرحي “إذاعة الأغاني”. على مسرح الحكمة. العرض هيبدأ الساعة 7 مساء. سعر التذكرة: 15 – 20 جنيه.
الضحك والفرفشة مع أصحابك مش هيخلص، لما كل واحد يطلع مواهبه في الغنا في حفلة الكاريوكي في رووم آرت سبيس. الحفلة هتبدأ الساعة 7:30 مساءً. سعر التذكرة: 50 جنيه.
ماتبطلوش تنبسطوا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
