The Definitive Guide to Living in the Capital , Cairo , Egypt

مساء الفل على الناس الحلوة. على طول كده وفي السريع، تعالوا ناخد جولتنا اليومية في أجندة كايرو 360. ونعرف إيه الجديد:

نبدأ من ساقية الصاوي مع حفلة الفنان أحمد مصطفى أو فرقة “شراع”. الحفلة هتكون على مسرح الحكمة في ساقية الصاوي. وهنسمع فيها مجموعة من أحلى أغانيه زي: عملت الصح – العيش والملح – أنا جلبي كيف ورق الشجر. الحفلة هتبدأ الساعة 7:30 مساءً. سعر التذكرة: 25 – 30 جنيه.

على بعد خطوات من الساقية، سينما الزمالك هتعرض الفيلم الإيراني “The Salesman”، وده بالتعاون مع سينما زاوية. الفيلم بيدور عن عائلة بتنتقل للعيش في مكان جديد، لكن بتقابلهم مشاكل كتيرة في السكن. العرض هيبدأ الساعة 7 مساءً.

أما سيما دكة في دكة أضف، فبتعرض النهاردة الفيلم الياباني “Rashomon”. واللي بيدور عن جريمة قتل، بيتم محاكمة المتورطين فيها. وكل شخص بيقول أحداث مختلفة. العرض هيبدأ الساعة 7 مساءً. والدخول مجانًا.

انبسطوا.