النهارده في القاهرة: ورش فنية ومزيكا وعروض أفلام
Mohammed Sabry
بدأنا الاسبوع والكل لسه بهمته ونشاطه. نكمل بقى بالنشاط ده علشان نعرف ننبسط بخروجات النهارده، من أجندة كايرو 360:
كجزء من عروض يوم الأحد، النهارده سينما زاوية في وسط البلد، هتعرض فيلم “جوع كلبك“. واللي بيدور عن التاريخ المعاصر للمغرب من بداية الستينيات، ولحد منتصف التسعينيات. العرض هيبدأ الساعة 7:30 مساءً. وسعر التذكرة: 35 جنيه.
لو ليك في النحت وعايز تطور من مهاراتك، باب 18 في مصر الجديدة بيقدم لك ورشة “نحت البورتريه“. هتتعلم فيها الأساسيات وكل حاجة عن نحت البورتريه. الورشة هتبدأ من النهارده الساعة 7 مساءً. وسعر الاشتراك: 800 جنيه.
علبة ألوان في الزمالك، هتستضيف حفلة غنائية للفنان وائل الفاشني، اللي غنى تتر واحة الغروب. الحفلة هتبدأ الساعة 8 مساءً. وسعر التذكرة: 75 جنيه.
أما رووم آرت سبيس في جاردن سيتي، هتعرض فيلم “Manhattan“. الفيلم بيدور عن علاقة بين كاتب تليفزيوني مطلق، وبنت مراهقة. العرض هيبدأ الساعة 8:30 مساءً. وسعر التذكرة: 35 جنيه.
يا رب تنبسطوا.