النهارده في القاهرة ولمدة أسبوع: معرض الساقية المفتوح للكتاب
Cairo 360
الحقيقة وإحنا بنقلب يوميًا في الفعاليات الموجودة في أجندتنا على الموقع بنقف قدام بعض الأيام محتارين شوية.. الأيام اللي بنلاقي فيها الفعاليات كلها –أو معظمها- ماشية في اتجاه واحد ومواضيعها منسجمة جدًا زي ما تكون الجهات المختلفة اتفقت أنها تخدم نفس الشريحة من الناس في نفس اليوم! .. الشيء الجميل بقى أنه الانسجام العفوي ده جه النهارده وأخد في سكته كمان الحملة اللي موقعنا أطلقها مع بداية الأسبوع لتشجيع القراءة في القاهرة.. وهي حملة #صاحب_كتاب.
أهم فاعلية النهارده في القاهرة ماشية في اتجاه ثقافي شوية وبتخدم بشكل كبير عشاق الكتب وجلسات النقاش والندوات التثقيفية.. الحدث اللي هيبدأ النهارده من بطل الأجندة الأول والمعتاد "ساقية الصاوي".. وهو عبارة عن معرض كتاب مفتوح ومستمر لمدة أسبوع تقريبًا.. المميز في معرض الساقية أنه هيتجاوز الصورة التقليدية لمعارض الكتب المصغرة اللي بتبقى أشبه بسوق حر لتجارة الكتب، وهياخد شكل حدث ثقافي حقيقي مش مقتصر بس على شراء الكتب.
الحدث هيتضمن مجموعة فعاليات تانية زي ندوات ثقافية لكتاب وأدباء كبار، كمان حفلات توقيع لبعض الكتب بحضور أصحابها، وبعض ورش العمل للجمهور، ده غير الفعاليات الفنية اللي هتبقى بتقام على هامش المعرض من وقت للتاني علشان تخدم فكرته وتكمل جمال صورته.. المعرض هيفتح أبوابه من الساعة 10:00 صباحًا وحتى الساعة 10:00 مساءً طوال الأيام اللي هيقام فيها في الفترة مابين الاثنين 8 أغسطس، والسبت 13 أغسطس.. آدي العرض، وباقي عليكم الطلب!
مقترح
معالم وسياحة
90 دقيقة من القاهرة.. أجمل 7 أماكن في الفيوم هيغيروا موودك
أجمل أماكن الفيوم الفيوم +4
تسوق
