The Definitive Guide to Living in the Capital , Cairo , Egypt

سعيد محمود

“اليأس ضعف وخوف جبان.. لكن الأمل يفتح بيبان”.. كلمات عبر بيها الشاعر الراحل مجدي كامل عن قوة الأمل اللي ممكن تفتح أبواب كتير كنا فاكرينها مقفولة بترابيس حديد، وغناها مدحت صالح من ألحان المبدع خالد حماد، في فيلم الزعيم عادل إمام “أمير الظلام”.

 

أمير الأمل

وإذا كان صناع الفيلم اللي اتعرض سنة 2002 قدموا شخصية الطيار الحربي “سعيد المصري” اللي فقد بصره على إنه “أمير الظلام”، فبطل قصتنا النهاردة نقدر بكل ارتياح نقول عليه “أمير الأمل” في القاهرة ومصر كلها، لأن قصته فعلًا بتدي أمل لأي حد عنده مشاكل في حياته.

بطلنا هو “مصطفى”، فنان مصري كان بيحب المزيكا وبيشتغل عازف أورج، والدنيا ماشية معاه كويس وحامد ربنا على اللي هو فيه، لكن فجأة اتبدل حاله بعد ما اتعرض لحادثة مؤلمة جدًا تسببت في فقد بصره وعربيته من 7 سنين.

“مصطفى” كان ممكن ييأس ويقول الدنيا قفلت في وشي، لكن طاقة الأمل اللي جواه غلبت شياطين الإحباط، وبسرعة تمالك نفسه وقرر يتحدى ظروفه، وبدأ يمارس مهنته اللي بيحبها وينزل يعزف على الأورج مع زمايله، لكن القدر كان مخبي له تحدي تاني أشد، وهو فيروس كورونا.

 

اسعى يا عبد وأنا أسعى معاك

فجأة هاجم فيروس كورونا العالم، واتسبب في سقوط ضحايا كتير جدا، مش بس نتيجة الإصابة بالفيروس التاجي، لكن كمان بسبب فقدان ناس كتير لشغلهم بعد الركود الاقتصادي الرهيب من وقته انتشاره، وده اللي حصل مع “مصطفى” بعد ما توقفت الحفلات والأفراح اللي كان بيشارك فيها، ومن هنا بدأ التحدي الجديد.

“مصطفى” قِبِل التحدي وساعدته زوجته بنت البلد الأصيلة، وفكروا في مشروع صغير يعينهم على أعباء الدنيا، ولأنه بيحب الطبيخ من زمان، قرر يجهز ساندوتشات سريعة ويبيعها الصبح بدري للطلبة والموظفين، وبالفعل بدأ مشروعه يوم 4 ديسمبر الحالي، وزي ما المثل الشعبي الشهير بيقول “اسعى يا عبد وأنا أسعى معاك”، ربنا فتح على “مصطفى” من أول يوم، ورزقه بشاب قرر يساعده ويصوره، ويخلي البلوجر الشهير عدنان عبد المجيد صاحب صفحة “أكلة عدنان” يصور معاه.

بعد فيديو “أكلة عدنان” انتشر تريند “مصطفى” في فيس بوك انتشار كبير جدًا، وأكتر من موقع وقناة اهتموا يصوروا معاه، وبقى يخلص كل الساندوتشات اللي معاه بسرعة، والناس بتيجي له مخصوص عشان تاكل من عنده.

“العجر مش عجز الجسد، لكن عجز الفكر والعقل” ده كان كلام مصطفى اللي كرره في أكتر من لقاء، عشان يأكد لكل واحد بيواجه تحدي في حياته سواء إعاقة جسدية أو مشكلة في شغله أو حياته، إن الأمل فعلا يفتح بيبان زي ما كتب شاعرنا المبدع الراحل مجدي كامل في أغنية فيلم “أمير الظلام”.

دي كانت حكاية مصطفى أمير الأمل، ولو عايز تدوق طعم ساندوتشاته الجميلة وتاخد جرعة طاقة إيجابية من ابتسامته اللي بتفتح بيبان الرضا والأمل والتحدي لكل الصعاب، لازم تنزل بدري وتروح قبل الساعة 8 صباحا على مكانه اللي بيقعد فيه جنب المعهد العالي للدراسات المتطورة في 193 شارع الهرم وبالتحديد في محطة التعاون، وعشان تضمن إنه موجود تقدر تكلمه على النمرة دي (01095818165)، ولو خايف تتوه وإنت رايح بعد غلق شارع الهرم بسبب أعمال حفر مترو الأنفاق، تقدر تشوف اللوكيشن من هنا.