The Definitive Guide to Living in the Capital , Cairo , Egypt

طبعًا كلنا عرفنا إن وزارة النقل ممثلة في الشركة المصرية لإدارة وتشغيل مترو الأنفاق، قررت تغيير أسعار تذاكر المترو من يوم الجمعة، طب إيه هو الحل العملي اللي ممكن يفيدنا في مواجهة قرار زي ده؟

الحقيقة أننا بالتواصل مع إدارة المترو عرفنا أن فيه طريقة ممكن توفر لكم حوالي 50% من سعر التذكرة، الطريقة دي للأسف مش منتشرة قوي، وهي الاشتراكات.

فعلًا؟ الاشتراك بيوفر كتير؟ أيوة، يعني لو بتستخدم المترو يوميًا، يبقى لازم تفكر في موضوع الاشتراك، وفي السطور الجاية هنعرفكم أسعار الاشتراكات، وبحسب القرارات الجديدة فهي كالتالي للجمهور:

المرحلة الأولى حتى 8 محطات بمبلغ 360 جنيه، وفيها هيوصل سعر التذكرة 2 جنيه بنسبة تخفيض 33%..

أما المرحلة الثانية لعدد 16 محطة فهتكون بمبلغ 450 جنيه، وفيها هيكون سعر التذكرة اثنين جنيه ونص، بنسبة تخفيض 50%..

والمرحلة الثالثة لـ26 محطة هتكون بمبلغ 535 جنيه، وفيها هيكون سعر التذكرة اثنين جنيه و97 قرش، يعني بنسبة تخفيض 57.5%..

أما المرحلة الرابعة لعدد 37 محطة فهتكون بمبلغ 700 جنيه، وفيها هيكون سعر التذكرة ثلاث جنيه و89 قرش، بنسبة تخفيض 44.4%..

وكل اللي عليك علشان تقدر تستخرج اشتراك المترو، أنك تحدد عاوز اشتراكات لمدة ثلاثة شهور، ولا سنة كاملة.

بعد كده بتشتري استمارة الطلب، بمبلغ خمسة جنيه للربع السنوي وعشرة جنيه للسنوي، مع بطاقة الرقم القومي، وصورة شخصية، وخد بالك لازم تكون الاستمارة معتمدة من الجهة الإدارية المسئولة لفئات الطلبة والاحتياجات الخاصة و القوات المسلحة و الشرطة.

والاشتراكات بتكون من محطات مترو العتبة ورمسيس وشبرا.

مع العلم أنك بتتحمل قيمة الكارت الذكي بمبلغ عشرة جنيه، أول مرة عند إصدار الاشتراك.

نقطة إيجابية رغم اختلافنا مع قرار الحكومة في زيادة أسعار تذاكر المترو

رغم أن القرار سبب أزمة لناس كتير لكن نقدر نقول، رغم اختلافنا مع القرار، أن فيه نقاط إيجابية، منها عدم المساس بأسعار اشتراكات الطلبة وذوي الاحتياجات الخاصة، وكبار السن.

طب ده معناه إيه؟

معناه أن اشتراك الطلبة لعدد 25 محطة هيكون بمبلغ 33 جنيه، وعدد 35 محطة بمبلغ 41 جنيه، وأسعار اشتراكات ذوي الاحتياجات الخاصة لعدد 25 محطة هتكون بمبلغ 22 جنيه، وعدد 35 محطة بمبلغ 27 جنيه، وأسعار اشتراكات كبار السن لعدد 35 محطة بمبلغ 135 جنيه، بشرط تكون بعدد 180 رحلة خلال الثلاث شهور أو أيهما أقرب.