بالصور: كايرو 360 في زيارة لأول مشروع ثقافي من نوعه في القاهرة
Mohammed Sabry
من أسبوع أو أكتر، في حديث متواصل على السوشيال ميديا، عن مشروع مكتبة “ضع كتابًا.. وخذ كتابًا” في شارع الألفي في وسط البلد. واللي قام بها الدكتور المهندس نادر رياض. المكتبة موجود منها اثنين في شارع الألفي، وواحدة في شارع عماد الدين.
المبادرة دي قائمة على فكرة نشر ثقافة القراءة بين الناس. عن طريق مكتبة مفتوحة مجانًا للجميع، يقدروا من خلالها يحطوا كتب هم قروها قبل كده. وفي نفس الوقت يقدروا ياخدوا كتب تانية، غيرهم سابها في المكتبة. وطبعًا الكتب الموجودة مختلفة ومتنوعة، وشاملة مجالات مختلفة.
أما عن الدكتور المهندس نادر رياض، فهو دكتور مصري حاصل على دكتوراه في الهندسة الصناعية، من الولايات المتحدة. وجامعة أخن ألمانيا. ودرجات علمية تانية تقدروا تعرفوها من هنا.
إحنا بقى في كايرو 360 نزلنا شارع الألفي وسألنا الناس عن رأيهم في المبادرة، ودي كانت آرائهم:
هيثم محمد:
“الفكرة دي عظيمة جدًا ومفيدة. وفيها تحفيز للشباب على القراءة. في المكتبة العادية بتكون داخل عارف اختيارك، إنما هنا أنت بتشوف اختيارات الناس وتفهم بيحبوا إيه”.
عماد عبد الشافي:
“أنا عرفت المكتبة من تويتر عن طريق شخصية مشهورة بتابعها. ولقيتها قريبة كمان من شغلي. الفكرة دي مفيدة وحلوة جدًا، ولازم ندعمها. ده غير إن منطقة الألفي مشهورة بتبادل الثقافات المختلفة”.
أحمد يسري وعامر الأسود:
“شايف إنها لازم تبقى أكبر من كده، ومنتشرة في أماكن أكتر”.
“المكتبة شاملة، وفيها أنواع كتب مختلفة لكافة الأذواق”.
أحمد الخولي
“عرفتها لأنها جنب شغلي. والفكرة عجبتني جدًا لأني بحب القراءة. أنا لسه ماجربتش آخد منها كتب، بس عندي كتب كتيرة جدًا في مجالات مختلفة، وهجيبها أحطها هنا”.
مجدي شعبان
“فكرة عظيمة جدًا وهايلة جدًا. ولازم تعمم بشكل كبير. ويكون لها دعم من المقتدرين ورجال الأعمال، لإنها هتفيد كل الفئات بشكل كبير. بدل ما في كتب كويسة وأسعارها بتكون غالية”.
الكاتب محمد حامد
“الفكرة دي عظيمة، وحاجة مفيدة زي ما بيحصل في الدول الأوروبية. أتمنى تعمم بشكل كبير، ونحافظ عليها، ويكون عندنا ثقافة عدم التخريب. لأن ده للأسف بيحصل عندنا بشكل كبير. يا ريت الناشرين الكبار ودور النشر يدعموا الفكرة، ويشيلوا جانب من الإصدارات خارج إطار الربح، ويتحط في مكتبات زي دي”.
حبينا برضه نعرف رأي أصحاب المحلات المحيطة بالمكتبة. بما إن شارع الألفي منطقة حيوية جدًا، فيها محلات ومطاعم كتيرة، وقهاوي وكافيهات. ولما سألناهم عرفنا إن المكتبة بيكون عليها إقبال كبير الصبح من الطلبة، وبالليل من ناس مختلفة. إنما باقي اليوم بيكون الإقبال قليل. بس ده يمكن لأن الفكرة لسه جديدة وماحدش عرفها. وأغلبهم شايف إن الفكرة كويسة وهتفيد ناس كتير.
مشروع زي ده أكيد هيقدم حاجة مفيدة ومختلفة للمجتمع، ونتمنى إنه يقدر فعلًا ينشر ثقافة القراءة، اللي غايبة عن كتير من الناس عندنا. نتمنى الفكرة تنتشر والناس تحس بقيمتها وتحافظ عليها.
مقترح
تسوق
خلّي السعادة تكمل.. تشتري منين أحلى شوكولاتة في القاهرة؟
أفضل أنواع الشوكولاتة أماكن بيع شوكولاتةـ محلات شوكولاتة +3
الحياة في كايرو
