The Definitive Guide to Living in the Capital , Cairo , Egypt

تصوير: فتحية الدخاخني

مافيش أجمل من أنك تقضي يومك وسط الزهور الجميلة والطبيعة اللي تهدي الأعصاب، ومش هتصدق أنك تقدر تعمل ده بمنتهى السهولة بتذكرة دخول بجنيه واحد بس، آه لسه فيه حاجة بجنيه الحمد لله ومش لبان، حديقة الأورمان في الجيزة قدرت توفر جو من الجمال والرقي والأسعار اللي في متناول الجميع علشان كل فرد يستمتع بالجمال ويشتري زرعة صغيرة يبدأ سعرها من 5 جنيه لـ 1000 جنيه لو هتجهز جنينة خاصة بك. ومافيش أجمل من أنكم تستمتعوا بشم النسيم في مكان زي ده، خاصة إن فيه أماكن لعب خاصة بالأطفال.

لو دخلتم من الباب الصغير اللي قدام جامعة القاهرة بتلاقوا أماكن بيع قصاري الزرع والسماد وأدوات الزراعة، غير معارض المنتجات اليدوية ومعرض المنتجات النوبية. هتلاقوا كل أنواع قصاري الزرع من أول القصاري البني العادية لحد القصاري المزخرفة والملونة بألوان مختلفة. والأسعار بتبدأ من 15 جنيه. كمان أدوات الزراعة موجودة كلها والسماد بأنواعه للخضار أو نباتات الزينة وبيبدأ سعرها من 10 جنيه برضه. أما عن المعرض الأسواني فمش هتحتار ما بين أنواع التوابل والكركديه والسوداني وطبعًا أنواع الماسكات المختلفة للبنات والحنة السوداني. المعرض النوبي عاوز يوم كامل لوحده علشان تستمتعوه بيه.

وفي أخر الشارع ده في كوبري بيدخلك في وسط الحديقة فبيبقى على يمينك وشمالك محلات بيع الورد وفي وشك البوابة التانية للحديقة وكل مكان بيبع ورد أسعاره بتختلف عن اللي قبله وبتفرق في نوع الورد والاهتمام بيه، يعني زرعة الجهنمية الواحدة ممكن تلاقيها في أماكن سعرها يبدأ من 150 جنيه وفيه أماكن يبدأ فيها من 400 جنيه، ده طبعًا بيفرق من الحجم وسن الزرعة وطول مدة الرعاية بيها، بس مع حبة تدوير ممكن تلاقي زرعة أصغر بـ 35 جنيه بس. يعني بلاش تتسرع ولف كويس قبل ما تاخد قرار الشراء.

أما بالنسبة لأسعار الزرع فهي بتبدأ من 3:50 جنيه لـ 5 و10 و15 جنيه للزرعة الواحدة، واللي أشكالها كتير ومتنوعة وفيه أغلى من كده طبعًا على حسب النوع اللي هيعجبكم، بس متوسط أسعار مثلا زرع النعناع والريحان والروزماري  من 5 لـ 10 جنيه، أما الورد البلدي والياسمين والورد الملون الصغير فمن 10 لـ 25 جنيه.

كمان لو عاوز مكان تسيب فيه أطفالك يلعبوا بأمان فيه ملاهي صغيرة فيها زحاليق ومراجيح تقدروا تخلوا الأطفال يلعبوا فيها تحت إشرافكم. بس من أكتر الحاجات اللي لفتت إنتباهنا إن فيه مكان مخصوص ببيع الكتب الخاصة بالزراعة والمكان ده تابع لوزارة الزراعة، وأسعاره رخيصة جدُا الكتاب بحوالي 4 جنيه بس. كمان لو حد حابب يدخل بعربيته تذكرة دخول العربية 5 جنيه، وممكن تروح قدام محل الورد وهم يحطوا لك الورد اللي اشتريته.

خلصت جولتنا في معرض الزهور لعام 2017 في حديقة الأورمان بس أكيد مش هتكون أخر مرة نزوره خاصة أنه لسه هيخلص في 2 مايو 2017.