The Definitive Guide to Living in the Capital , Cairo , Egypt

من مميزات القاهرة إن أماكنها الجميلة بترحب بكل المستويات المادية، يعني معاك فلوس كتير هتستمتع، معاك فلوس قليلة هتستمتع برضه.. وفي الموضوع ده هنعرفكم على 5 أماكن هتنبسط فيهم، وهتاخد أجمل صور للذكرى، وهترجع بيتك وأنت في مود جميل.. يلا نبدأ.

1 – الأتوبيس النهري

 ومين مايحبش نيل القاهرة العظيم؟ الأتوبيس النهري واحد من أجمل وأرخص وسائل المواصلات النيلية في القاهرة، يعني ممكن تسميها خروجة وممكن تسميها توصيلة، لكن لو قررت تعتبرها خروجة فهي تجربة جميلة ومش هتنساها.

الأتوبيس النهري هيفصلك عن القاهرة بزحمتها وضجيجها، وهيديك فرصة عظيمة للاستمتاع بالنيل.

أشهر محطات الأتوبيس النهري :

* محطه ماسبيرو (أمام مبنى الأذاعة والتليفزيون)

* محطه الجامعة (بجوار كوبري الجامعة)

مواعيد الأتوبيس النهري :

من الساعه السابعه صباحًا و حتي الساعه الثامنه مساءً.

2- متحف العلم الحيواني (داخل حديقة الحيوان بالجيزة)

مكان جميل وممتع رغم إنه مش معروف بدرجة كبيرة لكل الناس، وهو موجود داخل حديقة الحيوان بالجيزة، لكن لما تدخله هتحس إنك فصلت بدرجة كبيرة عن الحديقة، خصوصًا لو الجو حر، وده بسبب إنه مكيف ودائمًا هادئ ونظيف، وطريقة العرض فيه غاية في الاحترافية.

المتحف فيه مجموعة كبيره جدًا من الحيوانات المحنطة.

المواعيد من 10 صباحًا وحتى 4 عصرًا.

3- القلعة

القلعة مكان جميل في القاهرة، قريبة من السيدة عائشة، وبتتميز بأنها عالية جدًا، ومن هناك هتقدر هتستمتع بمنظر جميل ومبهر للقاهرة التاريخية، والقلعة نفسها مكان تاريخي عظيم، هتستمتع فيها خصوصًا مع أولادك وأصحابك.

4- متاحف قصر عابدين

ودة  مكان موجود فيه عدد كبير من التحف والمقتنيات القيمة جدًا، وبصفة عامة قصر عابدين  من أجمل الأماكن اللي الواحد يقدر يزورها في القاهرة، لأنه قصر جميل ومبهر، وقريب من وسط البلد، ومواصلاته سهلة جدًا، والتصوير فيه تحفة.

أول ما تدخل حوالين القصر هتلاقي جناين كتير ودي لوحدها مهديه للأعصاب، ولما تدخل القصر هتشوف أجمل تحف ومقتنيات، والمكان نضيف جدًا و متأمن.

القصر مفتوح كل يوم من 10 الصبح لحد 12:30  الضهر ما عدا الجمعة.

5- برج القاهرة

 فُسحة مبهجة وجميلة للكبار والأطفال، ومش مُكلفة خالص، والفيو هناك تحفة، وهتقدر تستكشف القاهرة كلها من فوق البرج، ولو رايح بعربيتك روح بدري شويه عشان الركنة صعبة حبتين هناك وروح بدري كمان عشان تتجنب طوابير انتظار الأسانسير الطويلة.

أجمل وقت هو الغروب وأنسب وقت للزيارة بعد العصر وتجنب الظهر عشان الشمس هتضايقك وتجنب الجمعة والأعياد الرسميه علشان الزحمة.

مواعيد العمل من 9 صباحًا لحد  1 صباح اليوم التالي، والمدخل من تحت جميل وواسع ولازم تتصور سيلفي مع النسر النحاسي الضخم إللي علي البوابة.