The Definitive Guide to Living in the Capital , Cairo , Egypt

تقريبًا كل دول العالم قررت غلق المدارس كخطوة للحماية من فيروس كورونا المستجد، ومصر من الدول دي، والحقيقة إنها فعلًا خطوة مهمة، وقادرة على حماية المجتمع من انتشار الفيروس.

وبسبب إغلاق المدارس فيه أهالي كتير بتدور على طرق لمواصلة تعليم أطفالهم في البيت، ونفسهم تكون عملية التعليم المنزلي ممتعة رغم الظروف الصعبة المحيطة بينا.

ومؤخرًا عملت قناة “سكاي نيوز” حوار مهم مع توم روز وجاك بانيت، وهما مدرسين مهتمين اهتمام خاص بالتعليم المنزلي، واللي اتكلموا على أهم 5 نصائح ممكن تساعد أولياء الأمور على تخطيط عملية تعليمية ممتعة لأطفالهم من البيت.

التخطيط وتحديد الأولويات

أول نصيحة هي إنك لازم تكون واقعي وأنت بتدرس لأطفالك في البيت، وتبقى فاهم إنك مش مدرس محترف، وبناء عليه لازم تحدد الأولويات من خلال التركيز على المواد الأساسية زي الرياضيات، وتبقى عارف إن محاولة الانتهاء من كل المناهج الدراسية هتخليك أنت وطفلك متوترين.

خلي العملية مفتوحة

لازم أولياء الأمور يتشاركوا مع أطفالهم في بناء مدرسة منزلية افتراضية، ممكن تكون في أي غرفة من غرف البيت، وده طبعًا بعد ما نشرح للأطفال أسباب التعليم من البيت وأهميته، بعدها بنطلب منهم يختاروا اسم للمدرسة المنزلية، وتحديد طرق التدريس فيها سواء كان عبر السبورة أو الأجهزة اللوحية، وإشراكهم في اختيار المواد اللي حابين يدرسوها.

اصنع لهم روتين يومي

أثبتت التجربة أن الأطفال والبالغين بيتفاعلوا بشكل ممتاز مع الروتين اليومي، خاصة في فترة الصبح، وده ممكن يتم عن طريق إننا نحط جدول للحصص، ونطلب منهم ارتداء لبس معين، والبدء في ساعة محددة. يعني الهدف يحسوا إن الموضوع جاد مش هزار.

خليك مدرس مثالي

حط نفسك مكان طفلك وتخيل أنه بينظر ليك كمعلم مش كأب، وده في حد ذاته هيدي عملية التعليم من البيت نوع من الجدية، وهيساعد أطفالك على اتخاذ قرارت بشكل أفضل، وخليك متأكد أن الفصل المنزلي بيدي أطفالك فرصة أكبر لتبادل الأدوار والفهم والسيطرة مقارنة مع الفصل المدرسي اللي بيكون مكتظ بالأطفال.

ادي لهم “فسحة”

هتكتشف مع الوقت أن التدريس مهمة مرهقة، علشان كده مهم تمنح أطفالك فسحة يومية مرة أو مرتين، ياكلوا فيها شوية فواكه وخضراوات من مكان محدد في البيت، يكون كأنه “الكانتين”، ولازم كمان تخصص لهم حصة للتمارين الرياضية.