The Definitive Guide to Living in the Capital , Cairo , Egypt

الصورة الرئيسية للقناطر الخيرية تصوير: الغول

مصر فيها متاحف عظيمة مش واخدة حقها، وعلشان كده بنحاول طول الوقت نشجعكم على زيارة المتاحف دي والاستمتاع بالكنوز الجميلة اللي فيها، واللي صعب تلاقوها في أي مكان تاني في العالم، ولو نفسكم تزوروا متحف مهم وممتع ومفيد، بنرشح لكم زيارة متحف الري في القناطر الخيرية بمحافظة القليوبية.

متحف القناطر أو متحف الري هو متحف جميل بيضم نماذج لمشروعات الري وتطورها عبر السنين، وبيجسد مراحل مهمة فى تاريخ مصر.

بيحتوي المتحف على نماذج أثرية متنوعة لأنظمة الري المختلفة، ومنها الشادوف وهو رافعة من النوع الأول، استخدمها الفلاح المصري لري الأراضي الزراعية واستخدم الفلاح أدواته من الطبيعة علشان يصنع الآلة دي، والطنبور والساقية، وطلمبات رفع المياه، والوحدات العائمة، بالإضافة لطرق الري الحديثة، زي الرش، والتنقيط، والري المركزي، والري الخطي، وغيرها من أدوات الري اللي بتعبر عن الحضارة المصرية في أبهى عصورها، وبتحكي تاريخ مدرسة الري المصرية عبر العصور، وكمان بتظهر الإبداع المصري العظيم في الاستفادة من مياه نهر النيل.

وبيقول الدكتور جاسر عطا، مدير عام متاحف بمصلحة الري، في حوار حديث نشرته جريدة المصري اليوم، إن بداية إنشاء المتحف كانت مع تأسيس القناطر الخيرية، وتم تجديد المتحف وافتتاحه مرة تانية في سنة 2011.

والمتحف مبني على أحدث طراز معماري وتقني، وفيه قاعة عرض سينمائي مطورة ومسرح خلفي ونافورات ومجاري مائية بتكسوها الخضرة.

وبيضم المتحف ٣ أقسام، أهمهم القسم الأول اللي فيه نماذج خشبية عن القناطر والسدود، والقسم الثاني اللي بيحكي عن طرق الري القديم والحديث، والمتحف فيه خريطة نادرة، (أول خريطة للنيل أعدها بطليموس قبل الميلاد)، وهي الخريطة اللي وضعها هيرودوت في كتابه.

بيضم المتحف كمان وثيقة نادرة لشهادة من كلية الهندسة زمان، لما كان اسمها المهندسخانة، وده قبل ما تكون كلية، والشهادة دي منسوبة لشخص اسمه محمد أفندي السيد، واللي حصل سنة 1913 على شهادة المهندس.