The Definitive Guide to Living in the Capital , Cairo , Egypt

كايرو 360 بـ تعلن اليوم بكل فخر واعتزاز عن أسماء الأماكن الحاصلة على جوائز اختيارات محرري كايرو 360 للأفضل في كل مجال. جوائز كايرو 360 هي ختم جودة من طراز خاص، ونوع من التأكيد على أننا عارفين أحسن حاجة ممكن القاهرة تقدمها لنا.

انطلق موقع كايرو 360 عام 2010، ومن أول يوم لحد النهارده مش بـ يدخر محرريه أي مجهود في اكتشاف كل زاوية وركن في دهاليز العاصمة الصاخبة –المحبطة أحيانًا– لكن عمرها ما كانت مملة.

سواء كانت اكتشافاتنا دي موجودة بين أروقة أفضل الفنادق العالمية الموجودة على طول نهر النيل، أو في شوارع وحارات وسط البلد؛ كل ده كان له دور في أن كايرو 360 تبقى مصدر موثوق للحصول على المعلومات والآراء في كل ما يخص القاهرة، والكلام ده للمصريين والأجانب على حد سواء.

وبطبيعة الحال فإن كل محرري الموقع بـ يتم معاملتهم على مر السنين كدليل بشري متحرك بـ يتم سؤاله عن كل ما هو جديد -أو حتى قديم- في العاصمة، أصحابهم وعائلاتهم مش بـ يفرقوا كثير عن القراء ورواد الموقع، مش بـ يفوتوا فرصة إلا لما يسألوهم بالتليفون وعلى الإنترنت أو حتى على الواتس آب. لكن في النهاية بـ يفضل لكل واحد مننا أماكنه المفضلة والمطاعم اللي بـ يفضلها عن غيرها، علشان كده عملنا جوائز اختيارات محرري كايرو 360 اللي بـ تحصل عليها أماكن معينة في مجالات الأكل والضيافة والتسوق.. إلخ، أماكن متميزة عن غيرها وبـ تقدم تجربة استثنائية في مجال تخصصها.

من بين أكثر من 5000 مقال نقدي بـ يغطي حوالي 3000 مطعم وكافيه  و3000 محل و30 فندق، عندنا 101 مكان بس حصلوا على جوائز المحررين وده بعد سلسلة من الاجتماعات الحامية والحاسمة، اللي جمعت بين محرري كايرو 360 وبين مديرين التحرير في الموقعين العربي والإنجليزي.  

وضعنا في عين الاعتبار مجموعة من المعايير الصارمة منها جودة المنتج نفسه، ومستوى الخدمة، وقيمة المنتج بالنسبة لسعره وغيرها من العوامل المهمة لأي تقييم. ووضعنا القائمة النهائية الحصرية الخاصة بموقعنا علشان نكرم عدد من الأماكن ونسلط الضوء عليها دون غيرها، الأماكن اللي أعطت للقاهرة طابعها الخاص، وخليتها في رأينا واحدة من أجمل المدن اللي ممكن يعيش فيها كل الناس على كل المستويات.

ادخل صفحة جوائز اختيارات محرري كايرو 360 علشان تعرف الفائزين في كل قسم، وإحنا أكيد مهتمين نعرف رأيك في اختياراتنا!

مبروك للفائزين!