Mohammed Sabry
كتير مننا اتعرض للنصب في موقف معين من حياته. أو على الأقل سمع عن حركات نصب وسرقة بأشكال كتيرة ومختلفة. وعلشان تقدروا تاخدوا احتياطاتكم في من الموضوع ده، جمعنا لكم أشهر حركات النصب، اللي ناس كتير اتعرضت لها في القاهرة.
سواق التاكسي المغلوب على أمره
في نصباية خاصة ببعض سواقين التاكسي، وهي إنه يعمل فيها عنده ظروف صعبة ومحتاج فلوس، علشان الزبون يديله أجرة زيادة بدافع الشفقة. وبتكون التمثيلية إنه يطلع تليفونه ويعمل نفسه بيكلم حد قريبه. ويقعد يحكيله إن مراته أو ابنه مثلًا تعب ونقلوه المستشفى. ومش قادر على التكاليف. وبيستلف من كل اللي يعرفه. ويفضل يحكي ويتمسكن طول الطريق. وطبعًا يصعب على الزبون الطيب، ويديله اللي فيه النصيب.
البيضة والحجر
هنا مش بنتكلم عن الفيلم، إحنا نقصد بيضة وحجر فعليًا. في ناس بتسرق العربيات في الطرق البعيدة بالليل، بإنهم يرموا بيضة على إزاز العربية. طبعًا اللي سايق يتفاجيء ويشغل المساحات، وده أكبر غلط.. لأن المساحات هتخلي البيض يغطي الإزاز كله ومش هيشوف قدامه. ويضطر يركن على جنب. ساعتها هيتعمل معاه الواجب وهو لوحده. أو نفس الموضوع بحجر يترمي على العربية. ولما تنزل منها يحصل نفس السيناريو.
زحمة المترو
معروف إن المترو بينجز الوقت في المشاوير. بس خد بالك إنه مكان زحمة جدًا، وبسهولة ممكن يتسرق منك موبايلك أو محفظتك من غير ما تحس. فلازم تحرص على حاجتك. ولو معاك شنطة، يُفضل تلبسها قدامك مش على ضهرك، علشان تبقى قدام عينك. لإنها ممكن تتفتح من غير ما تحس واللي فيها يروح.
سرقة الشوارع
لو بتتكلم في موبايلك وأنت ماشي في الشارع، راكب عربيتك أو مواصلة، ممكن بسهولة يتخطف منك من حرامي راكب موتوسيكل. ومش هتلحق تمسكه. علشان كده لو ضروري تتكلم، خلي موبايلك أو شنطتك عكس اتجاه العربيات يعني ناحية الرصيف مش الشارع. وإيدك على شنطتك متبت عليها.
عداد التاكسي
خد بالك من عداد التاكسي لما تركبه. بص عليه اتأكد إن الرقم اللي ظاهر في المربع الأصفر -زي اللي في الصورة- هو 2، علشان لو الرقم ده 3، يبقى العداد سياحي والتسعيرة هتزيد عليك. وفي سواقين كتير بتعمل كده.
السرقة من العربية وأنت راكبها
لازم لما تركن في أي مكان، تقفل إزاز العربية كويس. لأن ممكن تلاقي حد جه بيكلمك من الشباك اللي على يمينك، ويفتح أي حوار. في نفس الوقت بييجي واحد تاني معاه ويسرق موبايلك أو محفظتك من شباكك. وأنت طبعًا بتكون مشغول مع الأولاني.
أرقام الونش على الطريق
خلي دايمًا معاك أرقام الطواريء لو اتعرضت لأي عطل بعربيتك على الطريق. أو كلم حد تعرفه. بس المهم تبعد تمامًا عن أرقام الونش اللي بتكون محطوطة في كل مكان على الكباري والطرق السريعة. لأن دي أحيانًا -مش دايمًا- بتكون أرقام ناس هتيجي تسرق عربيتك. ومش هتعرف تعمل حاجة وأنت لوحدك.
ممكن دقيقة من موبايلك؟
مش أي حد يوقفك في الشارع ويطلب منك يعمل دقيقة من موبايلك توافق. لأنه ممكن يكون حرامي وبكل سهولة ياخد موبايلك ويهرب. مهما كان شكله يوحي بغير كده. وخليك فاكر طول ما أنت في الشارع حاول ماتطلعش موبايلك من جيبك.
دي كانت مواقف ناس حصلت بالفعل ومازالت بتحصل. خدوا بالكم دايمًا من الأمور دي في أي مكان بتروحوه.
مقترح
معالم وسياحة
أبرزها "القاهرة التاريخية".. 7 مواقع مصرية على قوائم التراث العالمي
آثار مصرية اليوم العالمي للتراث +1
معالم وسياحة
