خطة عملية لكل اللي هيقضي ليلة رأس السنة في البيت
Nagla Ashraf
سنة جديدة سعيدة، ولو أنت من الناس اللي هيقضوا ليلة رأس السنة في البيت يبقى الأفكار دي هتفيدك جدًا.. جاهز؟
ليلة مع الأهل والأصدقاء
جهز فشار وفاكهة وكيكة حلوة أو تورتة ولم أصحابك وأهلك واعملوا برنامج مختلف تستمتعوا بيه، ممكن مثلًا تتفرجوا على فيلم مسلي، أو تلعبوا لعبة حلوة.. ممكن كمان تتناقشوا في موضوع جديد بس بلاش سياسة علشان القعدة تبقى حلوة.
ليلة تأمل مع أجندة 2018
سنة جديدة يعني بداية لفرصة مختلفة، وعلشان تعرف تستغل الفرصة دي صح، لازم تراجع نفسك وتشوف حققت إيه السنة اللي فاتت وعاوز تحقق إيه السنة دي، وفيه أجنتات كتيير بتتباع في مكتبات القاهرة بتساعدك على الموضوع ده زي نوتة ودفتر وسبيس، واللي بيقدموا أفكار للأجندات هتخليك تخط لمستقبلك، وتكتب ملاحظات وأهداف للسنة الجديدة، ده غير بعض الأنشطة التانية المميزة.
السنة الجديدة أجمل مع فعل الخير
لو عاوز تسعد غيرك بجد يبقى تلم أصحابك وتتفقوا تروحوا دار أيتام أو دار لكبار السن وتعملوا لهم ليلة مختلفة مليانة فرحة، سواء بأنكم تبقوا معاهم بس وتاكلوا حاجة سوا، أو تعملوا لهم برنامج ترفيهي متكامل كل واحد واللي يقدر عليه، بس أكيد هتكون سنتك مختلفة لما تقرر تسعد فيها حد ماتعرفوش.
ارمي الماضي اللي يغيظ
سنة جديدة يعني قرارات مهمة لمستقبلك، والقرارات دي مش هتحصل غير لو راجعت نفسك، وفكرت في الماضي وفي كل اللي حصل السنة اللي فاتت، وهنا بقى لازم تقف مع نفسك وقفة وتشوف عاوز تغير إيه في حياتك وماتعملوش تاني، زي لو فيه علاقة مؤذية لازم تنهيها، أو خبرة معينة سببت لك حزن لكن في نفس الوقت سببت لك خبرة في الحياة.
مهم ترمي الماضي اللي يغيظ ورا ضهرك، لكن قبل ما تعمل ده لازم تتعلم منه، تعتبره درس مجاني من الحياة.. الخلاصة: مافيش مستقبل حلو من غير ماضي خلانا نتعلم.
وكل سنة وأنتم طيبين!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
