The Definitive Guide to Living in the Capital , Cairo , Egypt

انتشر في الساعات الأخيرة على السوشال ميديا كلام كتير عن تجديد وتطوير واحد من أهم إنجازات المثّال المصري العالمي الراحل “فتحي محمود”  وهو تمثال “الفلاحة المصرية” .

الدكتور “خالد قاسم” -المتحدث باسم وزارة التنمية المحلية- قال إن فيه جهود بتبذل حاليًا لتصحيح الأوضاع اللي حصلت أثناء تجديد التمثال، ومنها إن الوزارة تواصلت مع الجهاز القومي للتنسيق الحضاري ومحافظة الجيزة، علشان يرجعوا شكل تمثال الفلاحة المصرية الموجودة في مدخل مدينة الحوامدية لأصله، بعد ظهوره بشكل مشوه، بأحمر شفاه “روج” وركبة ذهبية عارية.

وتداركًا للخطأ ده، “قاسم” أكد إن التمثال هيفضل متغطي لحين إعادته لأصله، وعلشان الغلط ده ما يتكررش تاني، هيكون في كتاب دوري بيوضح التعليمات اللي يتم اتباعها في صيانة التماثيل بشكل عام، بالتنسيق مع الجهاز القومي للتنسيق الحضاري.

وكمان هيتم الاستعانة بخبراء متخصصين من كليات الفنون الجميلة، لمراجعة التماثيل وإعادتها لأصولها.

استجابة وزارة التنمية المحلية والجهاز القومي للتنسيق الحضاري في الجيزة جت سريعة بعد تناول عدد كبير من مستخدمين السوشال ميديا صور لتمثال الفلاحة المصرية في مدخل مدينة الحوامدية بعد تجديدة بشكل ساخر وساخط، لإن الشكل النهائي للتمثال بعد التجديد مش متناسب مع قيمته الفنية الكبيرة زي ما قال معظم المنتقدين لشكل التمثال بعد “تشويهه”.