The Definitive Guide to Living in the Capital , Cairo , Egypt

الموسيقى والأغاني أنواع مختلفة: منها الجاز والبلوز والكلاسيك والراب. ومنها نوع تاني خاص بأغاني التراث والأغاني الصوفية وموسيقى أهل الجنوب. فلو انت من هواة النوع التاني ده يبقى مسرح الضمة هو مكانك المناسب اللي بتدور عليه.

مسرح الضمة هو مسرح تابع لمركز المصطبة للموسيقى الشعبية المصرية. تم افتتاحه في أغسطس 2010. وبيقدم برنامج يشمل عروض حية للفرق اللي بيرعاها مركز المصطبة، مع التركيز على إحياء تقاليد السمسمية، وموسيقى الرانجو، والموسيقى النوبية، والموسيقى الصوفية، وموسيقى البدو، وموسيقى من صعيد مصر.

وعلشان الناس اللي بتحب اللون ده من الفنون، كايرو 360 عملت لكم تجميعة بحفلات شهر يناير على مسرح الضمة، تعالوا نشوفها:

12 يناير فرقة الكف الأسواني

انضمت فرقة الكف الأسواني، بقيادة الفنان محمد الإدفاوي لمركز المصطبة حديثًا. الفرقة بتقدم فن الكف الصعيدي اللي بيعود تاريخه لأيام الفراعنة. وهو فن بيعتمد على الارتجال والإبداع في نفس الوقت، وكمان بيشمل المواضيع الاجتماعية في الحياة. التفاصيل من هنا.

16 يناير دايرة الطبول

مسرح الضمة هيستضيف حفلة خاصة بالفنون الإيقاعية، مع عازف الإيقاع مصطفى بكار. تجربة لطيفة مع آلة الطبلة بتعيشها لمدة ساعتين. بتجيب طبلتك معاك، ولو ما عندكش بيوفروا لك واحدة. التفاصيل من هنا.

19 يناير فرقة الوزيري الاسمعلاوية

بتقدم فرقة الوزيري الاسمعلاوية أجمل الأغاني على نغمات السمسمية. الفرقة أسسها الريس “الوزيري” في الاسماعيلية عام 1994، على غرار فرقة الطنبورة البورسعيدية. التفاصيل من هنا.

26 يناير دراويش أبو الغيط

فرقة دراويش أبو الغيط بقيادة أحمد الشنكحاوي هتقدم زار أبو الغيط. اللي هو عبارة عن مزج بين الفنون الصوفية وموسيقى الزار. وبترجع تسمية الفرقة إلى انتسابها للشيخ حسن الغيطاني، من قرية أبو الغيط بمحافظة القليوبية. التفاصيل من هنا.

كل حفلات مسرح الضمة بتبدأ الساعة 8 مساءً. وسعر التذكرة موحد: 30 جنيه.

مسرح الضمة: 30 شارع البلاقسة، عابدين، وسط البلد.

انبسطوا.