The Definitive Guide to Living in the Capital , Cairo , Egypt

تصحى الصبح بدري رايح شغلك، الصيام مخليك تعبان شوية، الحر مزود الطين بلة! ماعندكش طاقة تتكلم كتير، ومش قادر تستحمل البشر.. إحنا حاسين بك، وهنقول لك شوية نصائح للتعامل مع البشر في رمضان.

 

أول حاجة لازم تعرفها أن الصيام الهدف منه مش الجوع وبس، الصيام إعادة اكتشاف لنفسك وللناس من حواليك، محاولة لأنك تشوف نفسك في مرايا، هل هتقدر تكون قوي؟ صبور؟ ولا شخص ضعيف مش قادر يتحكم في شهواته أو غضبه، لو فهمت الحقيقة دي هتعرف أن الصيام مش عقاب ليك ولا للناس اللي أنت بتتعامل معاها، يعني قول لنفسك أنك صائم بإرادتك، وبالتالي مش مفروض تحمل الناس ذنب أنك مرهق شوية من الصيام، بالعكس عامل الناس أفضل ما بتعاملهم في الأيام العادية. اثبت لنفسك أنك قوي، أنك إنسان بجد.

 

كبر دماغك في الصغائر.. أيوة بالضبط زي ما قرأت بالضبط، ولو سايق عربيتك في الطريق وواحد كان هيخبطك بلاش تتخانق معاه بمنطق "ده كان هيخبطني" أيوة أديك قولت لنفسك "كان" يعني لسه ماخبطكش وبالتالي ماينفعش تتخانق على اعتبار ما كان سيكون! لو حد داس على رجلك في المترو عادي سامحه وقوله حصل خير وكل سنة وأنت طيب، الكلمة دي لها مفعول السحر. خليك كريم زي شهر رمضان.

 

احذف تمامًا جملة "ماتخلنيش أفطر عليك" من قاموسك، رمضان شهر أرقى بكتير من أنك تستخدمه في تهديد الناس، أنت بتجاهد نفسك، وده أقوى جهاد على فكرة، الإنسان بطبعه ضعيف، والصيام الهدف منه تكون أقوى.. هو ده الاختبار الحقيقي.. أوعى تسقط في الاختبار.

 

نيجي بقى لنقطة مهمة.. فيه شوية جمل بلاش تستخدمهم خالص في تعاملك مع الناس زي "صايم ولا زي كل سنة"، على فكرة جملة دمها تقيل والصيام أمر شخصي بين العبد وربه، بلاش يبقى مساحة للهزار أصلًا! بلاش تفتكر أنك ظريف ولطتشيف لما بتقول الجملة دي.. كمان بقت جملة قديمة قوي قوي على فكرة.

 

لما تحس أنك مخنوق شوية لازم تدور على سبب خنقتك.. في الغالب الصيام نفسه "كفكرة" مابيخليش حد متضايق، المفروض العكس، غالبًا سبب ضيقك حاجة تاني بس إحنا وسط الزحمة بنرمي كل حاجة على الصيام، فكر براحة مع نفسك وحاول تعرف سبب ضيقك ولو عندك مشكلة ابدأ في حلها، تصالح مع نفسك وواجه أي مشكلة. واتكلم مع أقرب أصدقائك أكيد هيقف معاك.

 

وأخيرًا لازم تعرف حاجة: صيامك مش معناه أنك تعامل الناس بقلة ذوق بحجة "اللهم أني صائم". الصيام معناه أنك شخص ناضج بتحاول تلاقي نفسك وسط صخب وشهوات الحياة.. فهمت بقى؟