The Definitive Guide to Living in the Capital , Cairo , Egypt

الحياة في كايرو

دليلك لويك إند سعيد: الإخوة أبو شعر في الأوبرا وافتتاح مهرجان الجيزويت للفيلم وأيامنا الحلوة في الساقية

دليلك لويك إند سعيد: الإخوة أبو شعر في الأوبرا وافتتاح مهرجان الجيزويت للفيلم وأيامنا الحلوة في الساقية
بواسطة
Cairo 360

الويك إند أخيرًا، نشوف بقى هنفصل إزاي علشان ندخل الأسبوع الجاي بروح جديدة وطاقة مشحونة.. نخرج مثلًا، بس فين وإيه وإمتى وإزاي؟

يوم الخميس أكتر يوم بنحب نتحرك فيه، واضح –زي ما قلنا كتير- أن القاهرة مذاكرة كويس كالعادة ولاقطة التفاصيل الصغيرة وبتبني خططها على أساسها، علشان كده هنلاقيه أكتر يوم زحمة بالفعاليات وفي مساحات منوعة تناسب جميع الأذواق.. ساقية الصاوي هتستضيف حفل لـ "هشام خرما" بحضور العديد من الأسماء القوية في مساحة الطرب الروحي، سعر تذكرة الحضور 60 جنيه، والبداية من 8:00 مساءً.. ومسرح الضمة هيستضيف فرقة الرانجو والفن السوداني اللي بتقدم وجبة مفضلة لمحبي تراث الجنوب، سعر تذكرة الحضور 30 جنيه والبداية 9:00 مساءً.. والمسرح الكبير بدار الأوبرا هيستضيف لليوم الثاني على التوالي عرض باليه "سبارتاكوس" لمحبي الفنون الكلاسيكية الاستعراضية، أسعار تذاكر الحضور 50 – 75 – 100 جنيه، وبداية العرض هتكون الساعة 8:00 مساءً.

أما الجمعة يوم الراحة والاسترخاء بامتياز فهنكون على معاد فيه مع حدثين كرنفاليين مهمين جدًا، اختتام المهرجان الدولي للمسرح التجريبي والمعاصر على المسرح الكبير بدار الأوبرا المصرية في تمام الساعة الثامنة مساءً بعرض "يا سم" من مصر، وافتتاح فعاليات مهرجان الجيزويت الثالث للفيلم في جيزويت القاهرة الساعة 5:00 مساءً، بالإضافة لحفلين من العيار الثقيل في ساقية الصاوي، الأولى لفرقة أيامنا الحلوة على مسرح قاعة النهر في تمام الثامنة مساءً بسعر تذكرة حضور 50 للجلوس و 30 للوقوف، والثانية للفنانة داليا فريد مع أوركسترا أبيدوس السيمفوني بواقع عرضين الساعة 5:00 و 8:00 مساءً، بأسعار تذاكر 35 و 55 و 75 جنيه.

وييجي السبت يقفل الموضوع قفلة مناسبة جدًا، دار الأوبرا هتستضيف فرقة الإخوة أبو شعر علشان تحتفل برأس السنة الهجرية بالإنشاد والمديح  في تمام التاسعة مساءً بأسعار تذاكر حضور 35، 50، 75 جنيه.. والساقية هتستضيف حفلين للشاعر هشام الجخ، الأولى هتبدأ في تمام السادسة مساءً، والتانية في تمام التاسعة مساءً، وأسعار تذاكر حضور الحفل 50، 75 للجلوس، و 30 جنيه للوقوف.. وأسياد الزار هيكونوا على موعدهم الشهري في مسرح الضمة في تمام التاسعة مساءً بسعر تذكرة حضور 30 جنيه.

آه صحيح، كل سنة وأنتم طيبين بمناسبة السنة الهجرية الجديدة، وبمناسبة ذكرى نصر أكتوبر.

مقترح