The Definitive Guide to Living in the Capital , Cairo , Egypt

الأيام بتجري وكل واحد منا بيمشي في دايرة الحياة الخاصة به، واللي لو ماركزش إذا كان مستمتع بحياته ولا لأ هيلاقي حياته خلصت من غير ما يعمل اللي بيحبه، وعلشان كده بنحاول نوفر لكم دليل لأيام الويك إند بأحداث مختلفة تخرجكم من مود الروتين.

نبدأ بالنهارده، يوم الخميس، وحفل الفنان “يحيى خليل” على المسرح الصغير في دار الأوبرا المصرية، وسعر التذكرة 100 جنيه.

كمان فيه أمسية مختلفة لعشاق أفلام الأبيض والأسود باسم “هيستريالوج” في قاعة النهر في ساقية عبد المنعم الصاوي، وسعر التذكرة 35 جنيه للأعضاء و40 جنيه لغير الأعضاء.

أما لمحبي الإنشاد الديني هيكون فيه حفل لفرقة “وصلة سماع” على مسرح الحكمة في ساقية عبد المنعم الصاوي، والتذكرة بـ 25 جنيه للأعضاء، و30 جنيه لغير الأعضاء.

برضه في رووم آرت سبيس، فيه حفلة موسيقية لثلاثي رامي عطالله. سعر التذكرة: 50 جنيه.

 

وننتقل ليوم الجمعة، وحفل من نوع خاص في رووم اللي هتستضيف الفنانة السودانية آسيا مدني، وليلة من الفلكلور السوداني. سعر التذكرة: 50 جنيه.

ولو بتحب فن الجاز الفنان مصطفى رزق، هيحيي حفلة غنائية في مركز الربع الثقافي. سعر التذكرة: 50 جنيه.

أما لمحبي الفن الراقي ففيه حفل هارب للفنانة “ياسمين الحربي” في المسرح المكشوف في دار الأوبرا المصرية، وسعر التذكرة 25 جنيه.

ولعشاق الفضاء هيكون فيه من ضمن ندوات سلسلة علم الفلك، ندوة بعنوان “المريخ الكوكب الأحمر”، وتقديم م/ محمود عادل، والدعوة عامة.

ونختم بيوم السبت، واللي هتقدم فيه الفنانة ملك حفلة غنائية، في ييلو أمبريلا في المعادي. وسعر التذكرة: 50 جنيه.

كمان  فيه حفل فرقة “جميزة” في دار الأوبرا المصرية، وسعر التذكرة 50 جنيه.

والموسيقار فتحي سلامة، هيقدم حفلة موسيقية، مع طلاب مدرسة الدرب الأحمر. وسعر التذكرة: 35 جنيه.

برضه فيه حفل الفنان  “محمد باش” نجم برنامج ستار أكادمي على مسرح النهر في ساقية عبد المنعم الصاوي، وسعر التذكرة 60 جنيه.

لو عاوزين تعرفوا أكثر عن الأحداث اللي بننشرها كل يوم على مدار الشهر تابعوا أجندتنا.

ويك إند سعيد!