The Definitive Guide to Living in the Capital , Cairo , Egypt

السعادة حالة روحية بنحس بها ممكن يكون سبب من أسبابها توفر الفلوس اللي تخلينا نعمل حاجات بنحبها، بس عمر ما وجود الفلوس لوحده بيكون سبب السعادة، وسط كثير من دعوات التقشف، #كايرو_360 بتقول لك ما تبخلش على نفسك باللي يبسطها وفيه حاجات كتير ببلاش أو بفلوس قليلة.

نبدأ بيوم الخميس، فيه أحداث ما ينفعش نعديها زي مهرجان القاهرة السينمائي الدولي واللي بدأ من يوم الثلاثاء 15 نوفمبر وهيفضل مستمر لحد 24 نوفمير، وسعر تذكرة الحضور 20 جنيه بس، وبيكون فيه حفلات كتيرة ومتنوعة. كمان المهرجان السنة دي بدأ بداية مختلفة جدًا بسطت كتير من الناس وهي أغنية نسمة محجوب الإفتتاحية للمهرجان واللي كانت مبدعة ومحترفة جدًا.

أما لو عاوزين تستمتعوا بمزج موسيقى مختلف فعلًا دكة في المقطم عاملين حفل غناء مصري على أوتار الفيولين، مع الفنانة ريم سليمان وعازف الفيولين دانيال ميريل، والحضور مجاني. لكن لو بتدوروا على فكرة جديدة وسهرة مختلفة يبقى مكانكم في أوزوريس آرت سبيس اللي عاملة سهرة سينيمائية موسيقية مميزة لعرض فيلم "Dante's Inferno" مع عزف موسيقي لمجموعة Nar project، وسعر تذكرة الحضور 25 جنيه. كمان على مسرح قاعة النهر بساقية الصاوي  فيه حفل غنائي لفرقة عمدان النور، وسعر تذكرة الحضور 40 جنيه. وعشاق الفنون السيناوية مش ناسينكم لأن فيه في مسرح "الضمة" بوسط البلد حفل للغناء السيناوي البدوي لفرقة "الجركن" واللي بينظمه مركز "المصطبة" للفنون الشعبية والفلكلور، وسعر تذكرة الحضور 30 جنيه.

ونروح على يوم الجمعة، وحفلة مختلفة جدًا لأنها هتجمع بين أغاني المهراجنات والراب الأمريكي وده اللي هيشوفه اللي هيحضر في حفل سادات وواي كرو في الجريك كامبس في وسط البلد، وسعر تذكرة الحضور 30 جنيه.  لو عاوزين تسمعوا موسيقتهم أكثر فتفهموا شوفوا اللينك ده هنا.

أما الناس الحلوة اللي بتحب تركب عجل، جهزوا نفسكم علشان السفارة الهولندية بالقاهرة للسنة الخامسة عاملين جولة مفتوحة بالعجل في شوارع القاهرة، الجولة تبدأ من أمام حديقة الأسماك بالزمالك. كمان في علبة ألوان بالزمالك فيه حفل لمشروع "كركدن بالعربي" اللي هيقدم مزيج من التراث الغنائي الشرقي مع بعض الأغاني العصرية، وسعر تذكرة الحضور 50 جنيه شامل المشروبات. أما للناس المطرقعة اللي بتحب تجرب كل جديد ما تفوتوش اليوم اللي عامله مركز الربع الثقافي بعنوان "رعب في الربع"، وهيكون فيها فقرات مرعبة زي عرض فيلم رعب وجلسة حكي وفقرة سحر، وسعر تذكرة الحضور 35 جنيه.

ونختم بيوم السبت، ويوم مختلف بجد وممتع في الجريك كامبس لأنه هيجمع لكم كل الرحالة ومحبي السفر المصريين في مكان واحد، وسعر تذكرة حضور يوم "تحدي السفر" هو 30 جنيه. ولكل محبي الفنون الصوفية المختلفة مركز إبداع قبة الغوري، بيعمل "حفل تنورة" كل يوم سبت، وسعر تذكرة حضور الحفل 5 جنيه للمصريين.

لو عاوزين تعرفوا أكثر عن الأحداث اللي بننشرها كل يوم على مدار الشهر تابعوا أجندتنا.

ويك إند سعيد!