The Definitive Guide to Living in the Capital , Cairo , Egypt

كل يوم الدنيا بتتغير حوالينا، وطبيعي أن الناس كمان تتغير، بس المهم يكون التغيير ده مفيد وإيجابي، وفريق #كايرو_360 جدد لكم شكل الموقع علشان يخدمكم بشكل أفضل، وتستمتعوا فيه بكل الخدمات اللي بنقدمها.

ونبدأ رحلتنا في #أجندة #كايرو_360 من النهارده، يوم الخميس، وهتلاقوا في قاعة الحكمة بساقية الصاوي فيه حفل غنائي لفرقة إسكندريلا، وسعر التذكرة: 25 – 30 جنيه. كمان فرقة أوبرا القاهرة عاملة حفل أغاني الكريسماس وأوبرا التليفون على المسرح الصغير بدار الأوبرا المصرية. سعر التذكرة: 10 – 20 جنيه.

أما على مسرح الضمة ففيه حفل غنائي لفرقة الرانجو السودانية. وهتقدم الفرقة مجموعة من أغاني التراث السوداني الأصيل، وسعر التذكرة 30 جنيه.أما اللي عندهم أطفال وعاوزين يعلموهم حاجة مختلفة، فبيت السناري الأثري بحي السيدة زينب  هينظم ورشة عمل للأطفال تحت عنوان “زينة رأس السنة”، والورشة مجانية.

ونروح ليوم الجمعة، هتلاقوا مجموعة “مشربية” لتنشيط السياحة الداخلية وزيادة الوعي الأثري عاملة رحلة للأهرامات مع مرشدين سياحيين، ورسوم انضمام الفرد العادي 35 جنيه، وللطلبة 25 جنيه.

أما لو بتحبوا الإنشاد الصوفي فمركز الربع الثقافي عامل حفل غنائي لفرقة الرضوان الصوفية، وسعر التذكرة: 30 جنيه. كمان لسكان المعادي فيللا بهية في المعادي فيها حفل لفرقة الحضرة للإنشاد الصوفي، وسعر تذكرة الحضور 40 جنيه. عشاق المسرح يستعدوا لمفاجأة من أوزيريس آرت سبيس في جاردن سيتي اللي عاملة عرض مسرحي -مونودراما- بعنوان “صح النوم”، وسعر تذكرة الحضور 25 جنيه.

ونختم بيوم السبت، وهيستضيف مركز الربع الثقافي حفل فلكلور شعبي لفرقة “هيصة”. كمان  في مكتبة “أ” فرع المعادي فيه أمسية للإنشاد الديني مع المنشد الشاب مصطفى عاطف، وسعر تذكرة الحضور 35 جنيه.

أما لعشاق اللغة العربية مدارس النزهة منظمة احتفالية “اليوم العالمي للغة العربية” بقاعة الحكمة في ساقية الصاوي. أما  على المسرح الصغير بدار الأوبرا المصرية فيه حفل كورل أطفال الأوبرا. وسعر التذكرة: 10 -20 جنيه.

لو عاوزين تعرفوا أكتر عن الأحداث اللي بننشرها كل يوم على مدار الشهر، تابعوا أجندتنا.

ويك إند سعيد!