The Definitive Guide to Living in the Capital , Cairo , Egypt

الويك إند الأسبوع ده مليان أحداث وفعاليات وحفلات من كل الألوان، وعلشان احنا معاكم دايمًا، جمعنا لكم أهم الحفلات والعروض الموجودة في القاهرة، واللي ممكن تختاروا منها اللي تحبوه ويتناسب مع ذوقكم، وخليكم دايمًا فاكرين إن مع أجندة “كايرو 360” أكيد هتستمتعوا وتغيروا مودكم وتنبسطوا، ومعانا هترجعوا أول الأسبوع فايقين ورايقين ومستعدين للشغل:

يوم الخميس.. هنبتدي الويك إند بحفلة فرقة “وسط البلد” و”The Gypsy Jazz Project” ضمن فعاليات مهرجان القاهرة للجاز 2019، واللي هيستمر معانا طول الويك إند، وهتشارك فيه فرق كتير، من 9 دول مختلفة. أسعار التذاكر بتبدأ من 100 جنيه حتى 700 جنيه. الفعاليات هتبدأ يوميًا من 7 لـ 11:30 مساءً.

من الساعة 7:30 للساعة 10:30 “بيت السناري” هيستضيف حفلة للشيخ “زين محمود” هنستمتع فيها بسماع أغنية “يبكي ويضحك” اللي بينشدها بطريقة الحكي. الحضور مجانًا.

أما مركز “شفشاون” في الدقي فهيقدم لهواة الأفلام الروائية عرض للفيلم اللبناني القصير “كفرناحوم“. التذكرة بـ35 جنيه. العرض هيبدأ الساعة 8 مساءً.

يوم الجمعة.. هتكون بدايته مع المتعة والجمال في حفلة الموسيقار “عمر خيرت” اللي هيستضيفها مسرح “كايرو شو” في كايرو فيستفال سيتي، في القاهرة الجديدة الساعة 8. أسعار التذاكر (400 – 500 – 650 – 750) جنيه.

لأول مرة هيشارك الفنان الأردني “عزيز مرقة” بحفلة ضمن فعاليات “مهرجان القاهرة للجاز”  الساعة 8:30 مساءً في مركز التحرير الثقافي في الجامعة الأمريكية. سعر التذكرة 200 جنيه شاملة كل الحفلات خلال اليوم.

هيحلو السهر مع الفنان القدير “يحيى الفخراني” بحضور العرض المسرحي “الملك لير” على مسرح “كايرو شو” التجمع الخامس. العرض هيبدأ الساعة 10 مساءً. أسعار التذاكر (150 – 250 – 350 – 500 – 750) جنيه.

يوم السبت.. هنستمتع بصوت وعزف على الأوكورديون من الفنانة “يسرا الهواري” اللي هتكون موجودة في الجامعة الأمريكية الساعة 8 ضمن فعاليات “مهرجان القاهرة للجاز”. سعر التذكرة: 200 جنيه.

كمان ممكن تحضروا حفلة الإنشاد الديني اللي هتقدمها “فرقة الرضوان السورية” على مسرح الجمهورية الساعة 8. أسعار التذاكر: 45 و60 جنيه.

 الفنان “محمد شاهين” هيقدم حفلة غنائية في ساقية الصاوي الساعة 8. سعر التذكرة: 57 جنيه.

أجندتنا مليانة، والقاهرة لسة فيها أحداث أكتر وأكتر، ممكن تعرفوها وتتابعوها على “كايرو 360” النهارده وبكره وكل يوم من هنا.