The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: حفل صحبة وإفتكاسات ومريم صالح

دليل أحداث نهاية الأسبوع: حفل صحبة وإفتكاسات ومريم صالح
بواسطة
Cairo 360

كل إنسان بيحلم أنه يكون أسعد، أجمل، أنقى، كل واحد فينا بيعيش حياته وهو نفسه يكون بيحقق ذاته ويرضي ضميره ويعيش مبسوط، وعلشان نكون صرحا الحاجات دي بقى صعب تحقيقها اليومين دول مش مستحيل بس صعب شوية، فوسط كل الدوشة دي بتحتاج تفصل مع مسرحية أو حفلة حلوة أو حتى مناقشة كتاب، وإحنا في دليلنا هنا بنحاول نوفر لكم كل الأحداث اللي تخفف عنكم شوية وتفرحكم.

نبدأ بالنهارده يوم الخميس، وفي مركز الربع الثقافي بشارع المعز  فيه حفل غنائي لفرقة "صحبة" واللي هي عبارة عن مجموعة من الشباب بيقدموا فن الغناء السواحلي على السمسمية، وسعر التذكرة 25 جنيه. كمان على مسرح الجنينة فيه حفل لمشروع "صليب صوفي" اللي بيقدم الأشعار والأدبيات الصوفية مع الألحان والموسيقى القبطية في مزيج فريد، وسعر التذكرة 30 جنيه.

برضه مركز المصطبة للفنون الشعبية في مسرح الضمة عامل حفل موسيقي لفرقة دراويش أبو الغيط لفن الزار التراثي، وسعر التذكرة 30 جنيه. ولمحبي الفن الصوفي فيه حفل لفرقة "المولوية المصرية" بقيادة المنشد الصوفي "عامر التوني" في ساقية الصاوي بالزمالك، وسعر التذكرة 35 جنيه.

وننتقل ليوم الجمعة، وحفل لفرقة إفتكاسات في علبة ألوان واللي تعتبر من أقدم الفرق المصرية في وسط الآندرجراوند، وسعر التذكرة 50 جنيه. أما رووم آرت سبيس فعامل حفل موسيقي مميز من مؤلفات الموسيقار "علي عيسى" على العود، ومعاه بس على الإيقاعات الشرقية الفنان حسين المليجي، وسعر التذكرة 50 جنيه.

وفي مركز الربع الثقافي بشارع المعز  هتلاقوا حفل للموسيقى العربية مع فرقة "فويس" بقيادة المايسترو الدكتور أسامة الحسيني، وسعر التذكرة 25 جنيه. ولعشاق الكتب هتلاقوا في مكتبة "أ" فرع المعادي حفل توقيع ومناقشة لكتاب "فرعون ذو الأوتاد" للكاتب أحمد سعد الدين، والدعوة عامة.

ونختم بيوم السبت، وعلى مسرح الجنينة فيه حفل غنائي للفنانة مريم صالح مع منتج الموسيقى الإلكترونية زيد حمدان، وسعر التذكرة 30 جنيه. كمان فريق "Unusual Egypt"منظم كرنفال في شارع المعز، هيكون فيه عروض فنية مختلفة من فرق ومجموعات فنية مختلفة، بالإضافة إلى شرح تاريخي للأماكن والمزارات المختلفة، وسعر التذكرة 50 جنيه.

كمان مكتبة مصر العامة بالدقي عاملة ندوة بعنوان "الأماكن حواديت" هتحاضر فيها الدكتورة إيمان الأمير وأ. شيرين عادل عن ثقافات الشعوب المختلفة وأهمية السفر وفوائده، والدعوة عامة. ونختم بحفل التنورة في مركز إبداع قبة الغوري، وسعر التذكرة 5 جنيه.

لو عاوزين تعرفوا أكثر عن أحداثنا اللي بننشرها كل يوم على مدار الشهر تابعوا أجندتنا.

ويك إند سعيد!

مقترح