The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: حفل نسمة عبد العزيز والكفافة وزين محمود وHOH

دليل أحداث نهاية الأسبوع: حفل نسمة عبد العزيز والكفافة وزين محمود وHOH
بواسطة
Cairo 360

ما بين العزومات وخروجات الصحاب في رمضان، بيبقى نفسك في وقت تفصل وتعمل حاجة أنت بتحبها، أو تخرج خروجة حلوة خفيفة مختلفة مع الناس اللي بتحبهم في الويك إند، وده اللي بنقدمه في دليل أحداثنا.

نبدأ بالنهارده يوم الخميس، وسهرة مع صوت العود الشرقي الأصيل في بيت الهراوي من ضمن حفلات ليالي العود العربي واللي هيقدم حفل موسيقي للفنانين أسامة هشام ومينا جمال، والدعوة عامة. ولو عاوز تضحك بجد روح مسرح الجيزويت عاملين هناك حفل موسيقي لفرقة "بهججة" واللي هتقدم فيه مجموعة من المونولوجات والأغاني المبهجة المعاصرة، والدعوة عامة.

أما على المسرح المكشوف في دار الأوبرا فيه حفل لفرقة الإخوة أبو شعر للإنشاد الديني والابتهالات، في ليلة رمضانية مميزة هتاخدكم فيها الفرقة السورية المميزة لعالم جميل وسط قصائد المديح والتنورة المصاحبة لهم، وسعر التذكرة 50 جنيه. كمان مركز المصطبة فيه حفل لفرقة الكفافة بقيادة المطرب عبد الواحد البنا، على مسرح الضمة، وسعر تذكرة الحفل 30 جنيه.

وننتقل ليوم الجمعة، وليلة صافية في علبة ألوان بالزمالك اللي عاملة حفل للشيخ زين محمود المنشد الديني المعروف، وسعر التذكرة 60 جنيه. كمان على مسرح مركز الجيزويت الثقافي فيه عرض حكي بعنوان "خطي العتبة"، واللي من إخراج سحر الموجي، والدخول بأولوية الحضور.

أما السميعة كلهم فاجمعوا هنا علشان المسرح المكشوف بدار الأوبرا المصرية  مستضيف حفل غنائي للفنان علي الحجار، وسعر التذكرة 75 جنيه. ومن ضمن الليالي الرمضانية روم آرت سبيس فيها حفل لفرقة الطنبورة البورسعيدية واللي بتقدم الفن المصري السواحلي المميز على نغمات السمسمية، وسعر التذكرة 50 جنيه.

ونخام بيوم السبت، ومفاجأة بساقية الصاوي اللي مستضيفين حفل غنائي لفرق"HOH" واللي بيقودها الفنان هاني عادل، وسعر التذكرة 75 جنيه. ومن ضمن فعاليات مهرجان "حي" اللي مستضيفه مسرح الجنينة فيه حفل غنائي للفنانة التونسية "درصاف الحمداني"، وسعر التذكرة 30 جنيه.

أما عشاق المسرح ما تفوتوش العرض المسرحي "نعناع الجنينة" في قصر الأمير طاز بالتنسيق مع قطاع الإنتاج الثقافي، والدعوة عامة. كمان على المسرح المكشوف بدار الأوبرا المصرية فيه حفل للفنانة نسمة عبد العزيز وفرقتها، وسعر التذكرة 50 جنيه.

لو عاوزين تعرفوا عن أحداثنا اللي بننشرها كل يوم على مدار الشهر، تابعوا أجندتنا.

ويك إند سعيد!

مقترح