The Definitive Guide to Living in the Capital , Cairo , Egypt

طالت الأجازة وبعد ما كان من المفترض أن ده يكون آخر ويك إند في أجازة نصف العام بقى عندنا أسبوع كمان، ولحسن الحظ عندنا وفرة في العروض والحفلات والفعاليات الثقافية طوال الأسبوع اللي جاي، هـ تلاقوا كل تفاصيل على صفحات موقعنا، ونبدأ بالويك إند اللي هـ يبدأ كمان ساعات قليلة ونقول لكم ممكن تروحوا فين النهارده وبكرة وبعده.

النهارده فرقة السامر المسرحية هـ تقدم آخر عرض لمسرحية “الفاترينة” في مسرح البالون بقاعة صلاح جاهين، المسرح بدأ عرضها من بداية الأسبوع وحققت نسب مشاهدة جيدة. العرض من تأليف محسن مصيلحي وإخراج إسلام إمام والدخول مجانًا. 

عودة للمعارض الفنية، الفنانة ريهام السنباطي هـ تقدم معرضها الثاني من سلسلة روبابيكيا بعنوان “روبابيكيا أنتيكا” في مؤسسة دوم للثقافة في العجوزة، والدخول من الساعة 5 مساءً. 

فرقة نور عاشور عازف الساكسفون الخطير هـ تلعب الليلة دي في ساقية الصاوي في قاعة الحكمة، سعر التذكرة 20 جنيه والدخول الساعة 8 مساءً. 

حفلة ثانية مهمة جدًا في ليلة عيد الحب، فرقة بساطة الرائعة هـ يقدموا أجمل أغانيهم وهـ تسمعوا أحلى مزيكا في قاعة النهر النهارده في ساقية الصاوي، سعر التذكرة 30 جنيه، وحاول تروح بدري علشان تلحق مكان، الحفلة بـ تتزحم بسرعة. 

دار الأوبرا المصرية بـ تقدم حفل طرب وموسيقى عربية لفرقة عبد الحليم نويرة، هـ يقدم مؤلفات الموسيقار محمد علي سليمان على المسرح الكبير بمشاركة الفنان محمد الحلو. أسعار التذاكر 100 – 75 – 50 جنيه وللطلبة 75 – 50 – 35 جنيه، التذاكر متوفرة بشباك الحجز. 

مسرح الهوسابير بـ يقدم حفل ستاند أب كوميدي لمجموعة من الكوميديانات الشباب، أكيد هـ يتكلموا على عيد الحب وتقاليده، واللي هـ يلبس أحمر اليوم ده مش هـ يسلم من تريقتهم، سعر التذكرة 40 جنيه على باب المسرح. 

في متحف أحمد شوقي هـ يكون فيه معرض بعنوان الحديقة، وهو معرض عن فكرة الحديقة باعتبارها عالم مثالي فيها جمال هادئ، وهـ يتم عرض مجموعة لوحات لكبار الفنانين، واللي ممكن توصف بالكلمات الرئيسية؛ الجمال والشاعر. 

يوم الجمعة كايتس للرحلات والسفر بـ تقدم لكم يوم مش عادي بمناسبة الفالنتاين، مليان بالمرح واللعب مع المهرجان البدوي في الفيوم، هـ تروح وهـ تلعب كرة وتعمل سفاري وتتغدى مع أصحابك وهـ تقعد بعدها في خيمة ظريفة. سعر التذكرة 220 جنيه وهـ تبقى 150 جنيه لوهـ تيجوا بعربياتكم.

بالليل ساقية الصاوي بـ تدعوكم لحضور حفل موسيقي لفرقة المصريين بقيادة الموسيقار هاني شنودة وبمصاحبة الفنانة إيمان يونس، ومجموعة من أجمل أغاني عيد الحب في قاعة الحكمة، وسعر التذكرة 25 جنيه. 

أحلى ختام للويك إند يوم السبت هـ يبقى في درب 17 18 في مدينة الفسطاط وحفل “درب المزيكا” مع فرق لايك جيلي وشوارعنا وقص ولزق، وهو حدث يضم فرق موسيقية وفنانين متميزين من داخل وخارج مصر ومتوقع أنهم يعملوا شو مش عادي، ويقدموا أشكال موسيقية متنوعة ترضي كل الأذواق، سعر التذكرة 30 جنيه والدخول من الساعة 7 مساءً. 

كل سنة وأنتم طيبين بمناسبة عيد الحب بكرة، وماتنسوش الهدايا، بـ تفرق كثير على فكرة، لو مافيش حاجة فى دماغك معينة ممكن تشوف موضوعنا عن أفكار لهدايا عيد الحب للرجال والسيدات على موقعنا، والأهم ما تنسوش تشوفوا أجندة كايرو 360 علشان تعرفوا آخر أسبوع في الأجازة هـ يبقى عامل إزاي، نشوفكم على خير.