دليل أحداث نهاية الأسبوع: سلالم ونسمة عبد العزيز ومهرجان D-Caf ومعارض تسوق
Cairo 360
مساء الخير عليكم، يا ترى المقال الدوري اللي بـ ننشره في نهاية الأسبوع ده
وبـ نكتب فيه شوية أحداث وحفلات وأفكار للخروج مفيد بالنسبة لك ولا متابعة الأجندة اليومية للموقع أفضل بالنسبة لك؟ إحنا حابين نعرف رأيكم ومقترحاتكم بخصوص أي حاجة بـ نعملها على موقعنا،
دائمًا اكتبوا لنا على صفحة الفيسبوك أو على تويتر أو ممكن تكتب رأيك على الموقع
مباشرة في التعليقات أسفل المقال المنشور، ده شيء مهم بالنسبة لنا جدًا.
مش هـ نطول عليكم وهـ نقول لكم كام حاجة ممكن تعملوها بدءًا من الليلة دي لحد
يوم السبت، أول حاجة عندنا النهاردة بالليل حفل فرقة
سلالم في قاعة النهر في ساقية الصاوي، الفرقة دي طبعًا غنية عن
التعريف، واللي مش فاكرهم بـ نقوله هم أصحاب إعلان فودافون في رمضان اللي فات (شكرًا..شكرًا)
وطرحوا أول ألبوماتهم السنة اللي فاتت المكون من 8 أغاني ساخرة من تأليفهم
وألحانهم، الحفلة دي هـ تبقى جامدة صدقونا.
حدث مهم جدًا هـ ينطلق الأسبوع ده هو مهرجان وسط البلد للفنون المعاصرة D-Caf اللي هـ تكون كل فعالياته على مسارح في وسط البلد، تابعوا أجندة
كايرو 360 على مدار الأيام اللي جاية واعرفوا نوع العروض اليومية ما بين رقص حديث
وحفلات موسيقية ومعارض فنية للوحات والفوتوغرافيا والدعوة عامة.
في كايرو جاز كلوب (اللي محتاج حجز بالتليفون قبل ما
تروح دائمًا) هـ يكون فيه حفلين وراء بعض النهارده، الأول الساعة 8 مساءً وهو حفل أغاني أكوستك لشادي أحمد وبعده فريق Egoz اللي بموسيقى الروك أند رول هـ يكمل الليلة بدءًا من الساعة 10 مساءً.
نغير الموود شوية بحفلة بعنوان الجسر الموسيقي الفنلندي بدار الأوبرا بالقاهرة، وده
زي مهرجان بـ يتعمل بقاله 5 سنين في إطار التبادل الثقافي بين مصر وفنلندا وبـ
يتيح الفرصة للتعرف على أشكال مختلفة من الموسيقات العالمية، المهرجان
مستمر أيام الخميس والجمعة والأحد والاثنين، والدخول مجانًا.
هـ نغير الموود أكثر ونفكرك أن النهارده في «مكان» اللي
جنب ضريح سعد زغلول في وسط البلد هـ يكون فيه حفل أغاني شعبية من النوبة والسودان
مع ملكة الحنة ستونة، لو حجزت قبل ما تروح التذكرة هـ تبقى بـ 20
جنيه، لو رحت بدون حجز هـ تدفع 30 جنيه. الحفل بـ يبدأ الساعة 9 مساءً.
في قاعة الطنبورة في عابدين فيه حفل لفرقة دراويش أبو الغيط، أغاني شعبية وصوفية من
التراث المصري، الحفل بـ 20 جنيه وهـ يبدأ الساعة 9 مساءً.
يوم الجمعة في دار الأوبرا فيه حفل أغاني روك بالعربي
لفريق (كاميرا)، عجبنا له بعض أغاني ونعتقد أنه ممكن يعجبكم. الحفل على المسرح
المكشوف. وفي أفتر إيت After 8 في وسط
البلد اللي يشبه كثير كايرو جاز كلوب في شروطه وأجواءه، فيه حفل لفرقة (ليل وعين) هـ يبدأ الساعة 10 مساءً والحد
الأدنى للطلبات 100 جنيه.
على مسرح الجمهورية التابع لدار الأوبرا المصرية حفل
موسيقى عربية لفرقة التخت العربي بقيادة
ياسر معوض الساعة 8 مساءً.
يوم الجمعة كمان فيه مهرجان تسوق في مركب الباشا 1901
الساعة 11 صباحًا اسمه بازار الربيع، وللمهتمين بالموضة والتسوق برضه فيه يوم السبت معرض
تصميمات أزياء لنانسي نجيب في بوتيك بوش Posh في الزمالك.
حفل مميز جدًا الأسبوع ده كثير مننا بـ ينتظره من الموسم
للموسم هو حفل الفنانة نسمة عبدالعزيز
والعزف على آلة الماريمبا في دار الأوبرا على المسرح المكشوف يوم السبت الساعة 8
مساًء، احجز قبلها علشان ممكن ما تلاقيش تذاكر.
وعلى المسرح الكبير في نفس اليوم حفل أوركسترا القاهرة السيمفوني بقيادة المايسترو
نادر عباسي والحفل هـ يتضمن أعمال كلاسيكية ومعاصرة من الموسيقى العالمية.
عدد من عروض الأفلام السينمائية في الأوبرا ومركز صوفي
الثقافي في الزمالك، وعدد من المعارض الفنية المستمرة من أكثر من أسبوع في جاليري الزمالك
ودرب 17 18 وغيرهم، وعرض مسرحي في مركز الجيزويت الثقافي وأحداث كثير ممكن تعرفوا
تفاصيلها من خلال أجندة كايرو 360، القي
نظرة هناك لو مافيش حاجة هنا عجبتك، واكتبوا لنا رأيكم دائمًا.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
