The Definitive Guide to Living in the Capital , Cairo , Egypt

بعد رمضان وأجازة العيد الطويلة ناس كثير رجعت من الساحل ومحتاجة تقضي اللي فاضل من الصيف بتاعها هنا في القاهرة، وبما أن الامتحانات خلصت من زمان وفاضل شهر بس والأجازة تخلص، الحق قضي آخر الأسبوع عندك معانا.

جهز نفسك لثلاثة أيام هـ تتنطط فيهم في القاهرة وتأخدها رايح جاي.. لا تقول لي ساحل ولا عين سخنة ولا حتى غردقة، هـ تأخد ثلاثة أيام فن وتأمل وأحلى انسجام واستجمام وروقان نفسك فيهم بس مش مع ميجا كوكيز.. لأ مع أجندة كايرو 360.

النهارده الخميس استعد لبداية الرحلة.. مبدئيًا كده عندك خمس حفلات تخليك محتار مش عارف تحضر أنهي واحدة فيهم، فيه حفلة لفرقة “ملاكي القاهرة” بالمقهى الثقافي “علبة ألوان”، ودي فرقة روك مصري بـ تقدم أغاني هادفة وجميلة، ولو ما لكش في الروك ممكن تروح “المولوية المصرية” وده طبعًا لو بـ تحب الغناء الصوفي بقيادة الأستاذ عمار التوني في ساقية الصاوي.

أو ممكن تجرب حفلة “Looperia” ودي موسيقى أفريقية هائلة وكلماتهم من الشعر العربي القديم، وسعر التذكرة بـ 20 جنيه بس، وتفاجئنا “كراكيب” أنها عاملة حفلة في مكتبة الإسكندرية بـ 20 جنيه بس، فلو أنت من أهل الإسكندرية وعاوز تستمتع ما تفوتش الحفلة دي ولا حفلة “مشروع مصري” اللي في المسرح المكشوف بمكتبة الإسكندرية والتذكرة بـ 35 جنيه.

كمان فيه فيلم عن “يهود مصر” لو نفسك تدخل فيلم سينما، واللي هـ يستمر ليوم 26 أغسطس، ولو عاوز تعرف أكثر عن الفيلم هـ تلاقي مقال نقدي هنا، أما لو عاوز تشوف مسرحية غنائية آخر مزاج هـ تلاقي عرض “عن العشاق” في قصر الأمير طاز، واللي بـ تقدمها فرقة مركز الإبداع الفني (ورشة المخرج خالد جلال) ومعاهم عازفين من بيت العود العربي بإشراف الفنان “نصير شمة” واللي هـ تستمر للجمعة الموافق 22 أغسطس بس.

وإذا كنت من هواة الفن التشكيلي يبقى ما يفوتكش معرض “التوق إلى الألوان” لجاذبية سري بالجامعة الأمريكية والدعوة عامة وهـ يستمر ليوم الخميس في الرابع من سبتمبر. لكن لو نفسك تسمع شعر، متع روحك بأمسية شعرية بعنوان “تراتيل شعر” في مكتبة البلد واللي هـ يحضرها شعراء كثير منهم محمد همام، ونور أبو البيه وعبد الرحمن هشام.

ننتقل ليوم الجمعة هـ تستمتع بغناء فرقة “شوارعنا” في ساقية الصاوي في قاعة النهر ومجموعة من الأغاني المعاصرة، التذكرة بـ 25 جنيه، كمان فرقة “شوية فن” عاملة حفلة في نفس اليوم في قاعة الحكمة اللي في ساقية الصاوي بقيادة الفنان جو، وسعر التذكرة 20 جنيه.

بالتأكيد لو ما روحتش معرض فنون تشكيلية قبل كده لازم تروح معرض”مجموعة الصيف” بقاعة سفر خان واللي هـ يشارك فيه كبار الفنانين منهم الحسين فوزي، أحمد شيحة وأحمد نوار، الدعوة عامة.

ونختم بيوم السبت حفلة “سلالم” في كايرو جاز كلوب وخلي بالك أنك لازم تحجز من قبلها وغير مسموح بالدخول لأقل من 25 سنة وللـ couples فقط، أما إذا كنت عاوز تسمع روك عربي فروح ساقية الصاوي هـ تلاقي هناك “فرقة كود مصر وفرقة خيال” في قاعة النهر، سعر التذكرة 20 جنيه. وإذا كنت من محبي المعارض فمعرض الفنانة “إيمان سلطان” للتصوير بالأجريليك بساقية الصاوية هـ يعجبك أكيد.

لو عاوز تعرف أكثر عن أماكن تفيدك وتنقذك من الفراغ شوف الأجندة بتاعتنا اللي فيها أحداث الشهر كله يوم بيوم.

حياتك أحلى مع كايرو 360.