The Definitive Guide to Living in the Capital , Cairo , Egypt

أوقات سعيدة عليكم، ويارب الجميع يكونوا في أحسن صحة وحال، في ثاني أسابيع أجازة نصف العام ومع بداية شهر فبراير لاحظنا انفراجة لا بأس بها في عدد الحفلات والأنشطة الثقافية في القاهرة والإسكندرية كمان، وكأنها استجابة سريعة لمناشدتنا الأسابيع اللي فاتت للمراكز الثقافية المختلفة أنها تفك الحصار عن الحفلات والمسرحيات والندوات وتقلل الهواجس الأمنية شوية وتحاول تعيد الأمور لطبيعتها ويسيبوها على ربنا. الأسبوع ده فيه تنوع في الفعاليات بين المزيكا والمسرح والمعارض، ولازم نفكركم أن معرض الكتاب قرب يخلص لكن لسه فيه فرصة للزيارة النهارده بعد ما تم مده يومين كمان.

نبدأ بالنهارده الخميس، بيكيا الأسبوع ده بـ تقدم مفاجأة من نوع خاص وهي فرقة مشروع شيرين، أغاني روك وبوب بشكل مختلف، والتذاكر متاحة على الباب بسعر 25 جنيه، والدخول الساعة 8 مساءً. 

في أيام الويك إند الثلاثة ممكن تزور قاعة زيـاد بكير في دار الأوبرا المصرية وتشوف معرض “مقام حرف” وهو معرض من طراز خاص للفنان حسن زكي، وهو بـ يضم 40 لوحة معظمها كتابات لأشعار أبى الفارض والسهرودي وبعض العبارات فى محاولة جادة لنقل الخط العربي من تكويناته وخاماته التقليدية، الدعوة عامة والمعرض مفتوح يوميًا من 10 صباحًا حتى 2 ظهرًا ومن 4:30 مساءً حتى 8:30 مساءً.   

مش عادتنا نتكلم عن أحداث خارج القاهرة، بس بـ يحصل الاستثناء لما يكون فيه حفل للموسيقار عمر خيرت، اللي هـ يقام الليلة دي في مكتبة الإسكندرية في مركز الفنون، أسعار التذاكر 150 – 75 – 50 جنيه، ولمزيد من المعلومات اتصل بـ 01006662520. 

في تأبين الراحل أحمد فؤاد نجم هـ تغني فرقة بهية أهم أشعاره الليلة دي في مركز فوتوبيا في الكوربة. الفرقة بشكل أساسي بـ تقدم الأغاني الثورية اللي عبرت ولا تزال تعبر عن كفاح المصريين ضد المستعمر، سواء كان المستعمر الأجنبي في شكله القديم أو المستعمر الوطني في شكله الجديد، سعر التذكرة 20 جنيه. 

علي قنديل ستاند أب كوميديان مش عادي، قرر يعمل حفلة اسمها “حفلة أكونت الفيسبوك” في بيت الرصيف الليلة دي، هـ يفتح فيها الأكاونت بتاعه وهـ يعمل قعدة عربي ويضحكنا شوية، سعر التذكرة 30 جنيه.

يعرض مسرح ميامي الموجود في شارع طلعت حرب في وسط البلد عرض مسرحي جديد بعنوان “المحاكمة” وهو من إنتاج فرقة المسرح القومي، العرض بطولة أشرف عبد الغفور، أحمد فؤاد سليم، عماد الراهب، سلمى الديب، سامح فكري، حماده شوشة، ومجموعة من الشباب. 

تستضيف قاعة الأرض في ساقية الصاوي معرض تصوير فوتوغرافي تحت عنوان “محطة الزهراء للخيول العربية الأصيلة” الدعوة عامة والمعرض مفتوح طوال ما الساقية فاتحة أبوابها. 

يوم الجمعة ميعادنا مع فرقة كايروكي في حفلتين وراء بعض في قاعة النهر في ساقية الصاوي، سعر التذكرة 40 جنيه للحفلة الواحدة. الحفلة الأولى هـ تبدأ الساعة 4 عصرًا والثانية هـ تبدأ الساعة 7:30 مساءً.

مركز شبابيك بـ يتشرف بكرة بدعوتكم لحضور الحفل الغنائي للفنان علي الهلباوي، وهو واحد من أفضل المطربين والمنشدين في مصر حاليًا، سعر التذكرة 20 جنيه. 

يوم السبت كمان في مركز شبابيك هـ يبقى فيه سمينار وورشة  بعنوان ماستر سين لفن كتابة السيناريو السينمائي يحاضر فيها السيناريست والأديب أستاذ محمد رفيع وهي بـ تهدف لتعريف الحضور بكيفية تحويل أفكارهم إلى سيناريو سينمائي، الدعوة عامة.  

ممكن تستمتع بحفل لأغنيات الرائعة فيروز مع الفنان حسام سمير وحفل “فيروزيات على العود” في قاعة الحكمة يوم السبت الساعة 8 مساءً، وسعر التذكرة 30 جنيه. 

تابعوا أجندة كايرو 360 وهـ تلاقوها متخمة بالأحداث الأسبوع ده، حاولنا نختار أهمها الأجازة دي، ونشوفكم على خير الأسبوع الجاي.