The Definitive Guide to Living in the Capital , Cairo , Egypt

في ويك إند مش عادي، أو ناس كثير متوقعة أنه يبقى مش عادي، بسبب ذكرى 25 يناير ودعوات النزول من كل الأطراف واحتمالات الصدام، قررنا نحافظ على طقوسنا ونتكلم عن الأنشطة الثقافية والفنية اللي ممكن تعملها بعيد عن أي نشاط سياسي ممكن يشغل بالك الفترة دي، لكن أكيد أجندة الأحداث مش مساعدانا ومش لاقيين أحداث كفاية نكتب عنها خصوصًا يوم السبت الخالي من الفعاليات تقريبًا باستثناء المعارض اللي بدأت قبلها بكذا يوم ومستمرة لأيام وأسابيع جاية.

نبدأ بمعرض القاهرة الدولي للكتاب اللي فتح أبوابه للجمهور من النهارده ولمدة أسبوعين على الأقل في أرض المعارض في مدينة نصر. معرض القاهرة الدولي للكتاب في دورته الـ 45 يعتبر من  أكبر وأقدم معارض الكتاب في العالم العربي. التذاكر على الأبواب والمعرض مفتوح من 10 صباحًا.

تقدم الفرقة الإسكندرانية الشهيرة مسار إجباري حفل الليلة دي في كايرو جاز كلوب، الحجز ضروري ومن بردي كمان، ولمزيد من المعلومات والحجز طبعًا اتصل بـ 0233459939.

في مركز المصطبة اللي بـ يقدم أنواع وأشكال مختلفة من الفن الشعبي المصري هـ تلعب النهارده فرقة مزامير النيل على مسرح الضمة داخل المركز. مزامير النيل بـ يقدم موسيقى شعبية من صعيد مصر، سعر تذكرة حضور الحفل 30 جنيه عند الباب وسعر التذكرة عند الحجز المسبق 20 جنيه. 

والنهارده بيت الرصيف رجع يعمل حفلات علشان الناس ما تزعلش وبـ يقدم حفل أغاني روك وبوب لشيرين عمرو والحفل بعنوان سي بروجكت، الدعوة عامة يعني الدخول مجانًا. 

نروح لساقية الصاوي وفرقة المصريين بقيادة الموسيقار هاني شنودة، هـ يقدموا حفل غنائي بقاعة الحكمة، سعر التذكرة 25 جنيه والحفل يبدأ الساعة 8 مساءً، وفي قاعة النهر برضه في الساقية هـ يبقى فيه حفل غنائي لفرقتي سيتي باند وتاكسي باند “مادو ووائل عامر” وسعر التذكرة 20 جنيه والدخول من الساعة 7 مساءً.

ڤينت مكان سهر جديد فرض نفسه بقوة على الساحة خصوصًا مع وجوده في منطقة وسط البلد، والجديد أنه هـ يبقى منافس للمراكز الثقافية كمان وهـ يقدم عروض فنية موسيقية ومسرحية وبصرية. النهارده وبكرة هـ يقدم مسرحية تفاعلية مقتبسة عن رواية تاكسي للكاتب خالد الخميسي، سعر التذكرة 50 جنيه والحجز مهم.

النهارده وبكرة وبعده ممكن تروح معرض بعنوان شرقيات في قاعة صلاح طاهر في دار الأوبرا المصرية. معرض “شرقيات مبتكرة” للفنان عبد المنعم معوض مفتوح للجميع والدعوة عامة. المعرض مفتوح يوميًا من 10 صباحًا حتى 2 ظهرًا ومن 4:30 مساءً حتى 8:30 مساءً. 

وفيه معرض ثاني بعنوان “لحظات لا تقدر بثمن” للفنانة سهام محرم بقاعة زياد بكير بدار الأوبرا المصرية والدعوة عامة، والمعرض مفتوح يوميًا من 10 صباحًا حتى 2 ظهرًا ومن 4:30 مساءً حتى 8:30 مساءً.

لو تم إلغاء أو تأجيل أي فعاليات بـ يتم التنويه على صفحاتنا بأسرع ما يمكن، نشوفكم بعد أسبوع وبـ ندعي ربنا أنه يحفظ بلدنا من كل شر ويحفظكم قرائنا الأعزاء.. أجازة سعيدة.