The Definitive Guide to Living in the Capital , Cairo , Egypt

الحياة في كايرو

دليل كايرو 360 الكامل لمعرض زهور الربيع 2019

2019 الاورمان حديقة زهور الربيع شعير عسل معرض نباتات نخل
دليل كايرو 360 الكامل لمعرض زهور الربيع 2019
بواسطة
Mohamed Talaat

تصوير: كايرو 360

معرض زهور الربيع السنوي بدأ في حديقة الأورمان، من 21 مارس. وكالعادة زورنا المعرض علشان نعرفكم على كل تفاصيله قبل ما تروحوا. من منتجات وأزهار وأنواع نباتات مختلفة.

نصائح عامة

في البداية هنقولك على شوية نصائح بخصوص زيارة المعرض. حدد من البداية هتشتري إيه، ومتشتريش على طول. خد فكرة وسعر مرة واتنين وبعدين اشتري. لازم يكون معاك كاش، مفيش كريديت هناك إلا قليل جدًا. لو انت معاك عربية يبقى أدخل من بوابة شارع الدقي، اللي جنب مديرية أمن الجيزة. علشان دا مدخل العربيات.

الأسعار

رسم دخول الحديقة هيكون 2 جنيه زي ماهو. عربية واسكوتر بـ 20 جنيه. أما سعر دخول الكاميرا ارتفع وبقى 100 جنيه.

إيجار عربية اليد “البراويطة” جوة الحديقة مع عامل بيكون من 5 حتى 10 جنيه. انت وتقديرك، بس أكتر من كده متدفعش.  أما العربية الربع نقل لو انت هتنقل حاجات كتير، فأقل سعر هيطلع حد معاك هو 100 جنيه.

الورد

أي نوع ورد تشتريه، لازم تحط تحته خشب أو رملة. علشان غير كده هيموت منك خلال 3 أيام بالكتير. والأسعار تبدأ من 3 جنيه لحد 300 جنيه وأكتر، حسب نوعه. طبعًا في أنواع مختلفة كتيرة زي: زيتاريا – بندورة – الجزانيا – القرنفل  جراميا – بلدي – عمة القاضي – اللموتي، وغيرهم كتير.

منتجات مثمرة

هتلاقي كل منتجات الأشجار، مثمرة زي الموالح والحمضيات. سعرهم بيبدأ من 25 جنيه  لحد 220 جنيه.

أشجار متساقطة، اللي هي ورقها بيقع في الشتاء ويرجع ينبت تاني في الصيف. زي الخوخ – البرقوق – المشمش. ودي سعرها يبدأ من 35 جنيه لحد 140 جنيه. كمان أشجار الفواكه اللي تبدأ أسعارها من 50 حتى 350 جنيه.

النخل

سعره بيبدأ من 300 جنيه لحد 2300 جنيه. وفيه أنواع هتلقاها بـ 6500 جنيه. النخل بيطرح بعد سنتين بشكل طبيعي، أما بنظام الري والمبيدات، هيطرح بعد سنة واحدة.

لاند سكيب

لو انت عاوز تعمل نجيلة صناعي أو حتى ملعب كرة قدم، فلازم تبقى عامل حصابك على التصميم، ومركز انت محتاج إيه. لأن السعر بيكون على حسب التصميم. وفي العموم متر اللاند سكيب بيتراوح من 130 حتى 350 جنيه. والنجيلة الصناعي للملاعب المتر بيبدأ من 1175 حتى 3000 جنيه.

طيور وحيوانات

طيور الزينة في المعرض من الحاجات الرئيسية، وبالتالي لو انت محتاج بغبغان هتلاقيه بسعر 600 جنيه. وعندهم كمان (حمام هندي هزاز)، الاتنين بسعر 300 جنيه. وكتاكيت ألوان الواحد بـ 5 جنيه. أرانب الواحد بـ 60 جنيه. أحواض سمك بتبدأ من 250 جنيه لحد 700 جنيه. القط الشيرازي بـ 300 جنيه. كلاب بتبدأ من 700 حتى 1500 جنيه. هامستر 35 جنيه. نسناس مدرب: 5500 جنيه.

العسل

الأنواع في المعرض: حبة البركة الكيلو بـ 80 جنيه – برسيم بـ 70 جنيه – موالح بـ 80 جنيه – البردقوش بـ 80 جنيه – عسل روسي بـ 200 جنيه – بلح بـ 200 جنيه – جبلي مصري بـ 450 جنيه – صحراوي بـ 250 جنيه – سدر مصري بـ 500 – سدر سعودي بـ 800 جنيه – سانت كاترين بـ 380 جنيه – عسل سعودي بـ 3000 جنيه – عسل شمع علبة 300 جرام بـ 35 جنيه – حبوب اللقاح الغنية بالفيتامينات والبروتينات: 15 جنيه العلبة.

شعير

في المعرض مكان مخصص بيبيع الشعير بس. والشعير بيحل مشكلة نقص حمض اللايسين. المسئول عن ضبط معدلات امتصاص الكالسيون ونمو العضلات. وبيعالج مشكلة الحساسية للجولتين أو الاعتلال المعوي، وارتفاع معدلات السمنة المفرطة، بسبب الدقيق الأبيض.

منتجات أسوان

كل اللي نفسك فيه من أسوان هتلقاه هناك ماعدا “الملوحة”. هتلاقي كل أنواع البهارات – كل أنواع الزيوت الطبيعية للشعر، بسعر يتراوح من 25 لحد 30 جنيه –  مخمرية من 25 حتى 100 جنيه – كيلو البخور 120 جنيه – البلح بـ 30 جنيه – خروب ونعناع وحلف بر وليمون 60 جنيه – كركديه 100 جنيه للكيلو – ملوخية ناشفة 50 جنيه – سوداني أسواني بـ 60 جنيه. 

دي كانت جولتنا في المعرض، اللي حاولنا نجمع لكم من خلالها أكبر قدر من المعلومات. علشان تساعدكم.

مقترح